పెళ్లి తర్వాత మహిళలపై ఒత్తిడి తగ్గాలి : కిరణ్ బేడీ

పెళ్లి తర్వాత మహిళలు ఎదుర్కొనే భావోద్వేగ, సామాజిక పరిస్థితులపై మాజీ ఐపీఎస్‌ అధికారి కిరణ్‌ బేడీ తన అభిప్రాయాలను వ్యక్తం చేశారు. పెళ్లి వేడుకలు ఎంత అందంగా, అట్టహాసంగా జరిగినా.. ఒక మహిళ తనకు ఎంతో సురక్షితంగా, ప్రేమగా అండగా నిలిచిన పుట్టింటిని విడిచి వెళ్లడం భావోద్వేగపరంగా కష్టమైన అనుభవమని పేర్కొన్నారు. అదే సమయంలో అత్తమామలను సొంత తల్లిదండ్రుల్లా చూడాలనే అంచనాలు మహిళలపై పెట్టడం ఆచరణలో ఎప్పుడూ సాధ్యం కాకపోవచ్చని అభిప్రాయపడ్డారు.

వివాహానికి ముందే ఉద్యోగం, ఇంటి బాధ్యతలు, గృహ పనుల విషయంలో దంపతులు స్పష్టంగా చర్చించుకోవాలని కిరణ్‌ బేడీ సూచించారు. ఉద్యోగం చేసే మహిళలు అవసరమైతే గృహ సహాయకుల సహాయం తీసుకోవడంతో పాటు, భార్యాభర్తలు కలిసి ఇంటి బాధ్యతలను పంచుకోవాలని అన్నారు. మహిళలు తమ ఉద్యోగాలను వదులుకోవాల్సిన పరిస్థితి రాకుండా కుటుంబం నుంచి తగిన సహకారం ఉండాలని పేర్కొన్నారు. మహిళలు ఆర్థికంగా స్వతంత్రంగా ఉండటం ఎంతో ముఖ్యమని, భర్త నుంచి తగిన మద్దతు లభించకపోతే తల్లిదండ్రులతో కలిసి జీవించాలనే నిర్ణయం తీసుకున్నా వారిని తక్కువగా చూడకూడదని, అలాంటి నిర్ణయాన్ని గౌరవించాలని ఆమె సూచించారు.