

కార్తీక మాసం ప్రారంభం కావడంతో జగిత్యాల జిల్లాలో పెళ్లిళ్ల సందడి మొదలైంది. వివాహాలకు సంబంధించిన వస్తువులు, సేవలు అందించే దుకాణాల్లో రద్దీ పెరుగుతోంది. బంగారం ధరలు కొంత తగ్గినప్పటికీ, ఫంక్షన్ హాళ్ల అద్దెల నుంచి నిత్యావసర వస్తువుల వరకు అన్నింటి ధరలు పెరిగాయి. గత నెల రోజుల్లో 10 గ్రాముల బంగారం ధర రూ.10 వేల నుంచి రూ.12 వేల వరకు తగ్గినట్లు మార్కెట్ వర్గాలు అంచనా వేస్తున్నాయి. అయినప్పటికీ పేద, మధ్యతరగతి కుటుంబాలకు పెళ్లిళ్లు నిర్వహించడం ఆర్థికంగా భారంగా మారుతోంది. జిల్లావ్యాప్తంగా వివిధ ప్రాంతాల్లో వందలాది జంటలు వివాహ బంధంతో ఒక్కటి కానున్నాయి. దీంతో యువతీ యువకుల తల్లిదండ్రులు పెళ్లి పనుల్లో బిజీగా ఉన్నారు. జగిత్యాల, కోరుట్ల, మెట్పల్లి, ధర్మపురి, రాయికల్ వంటి ప్రధాన పట్టణాలతో పాటు పలు గ్రామాల్లో పెద్ద సంఖ్యలో వివాహ వేడుకలు జరగనున్నాయి.
జిల్లాలో వందల సంఖ్యలో పెళ్లిళ్లు జరగనున్న నేపథ్యంలో కుటుంబ సభ్యులు ముందస్తు ఏర్పాట్లపై దృష్టి సారించారు. ఫంక్షన్ హాళ్లు, క్యాటరింగ్ సేవలు, పురోహితులు, భాజా భజంత్రీలు, ఆర్కెస్ట్రాలు, డెకరేషన్ బృందాలు, ఫొటోగ్రాఫర్లు, వీడియోగ్రాఫర్లు, ప్రీ వెడ్డింగ్ షూట్ స్టూడియోలను ముందుగానే బుక్ చేసుకుంటున్నారు. వివాహాలకు అవసరమైన పట్టువస్త్రాలు, ఇతర దుస్తులు, బంగారు ఆభరణాలను కూడా ముందస్తుగా కొనుగోలు చేస్తున్నారు. జిల్లాలోని ప్రధాన పట్టణాల్లో సుమారు 150 ఫంక్షన్ హాళ్లు, 300 వరకు కమ్యూనిటీ హాళ్లు, పలు దేవాలయాల్లో వివాహ మండపాలు అందుబాటులో ఉన్నాయి. పెళ్లిళ్ల సీజన్తో షాపింగ్ మాల్స్, వస్త్ర దుకాణాలు, జ్యువెల్లరీ షాపులు, క్యాటరింగ్ కేంద్రాలు, పూల అలంకరణ సంస్థలు, వంట మాస్టర్లకు గిరాకీ పెరగనుంది. ముఖ్యంగా జగిత్యాల, కోరుట్ల, మెట్పల్లి పట్టణాల్లో బంగారం, వస్త్ర వ్యాపారాలు ఊపందుకోనున్నాయి. దేశంలోని వివిధ ప్రాంతాల నుంచి కొత్త డిజైన్లతో కూడిన వస్త్రాలను తెప్పించిన వ్యాపారులు, వినియోగదారులను ఆకర్షించేందుకు డిస్కౌంట్లు, బహుమతులు అందించేందుకు సిద్ధమవుతున్నారు.
కార్తీక, మార్గశిర మాసాల్లో అంటే నవంబరు, డిసెంబరు నెలల్లో వివాహాలు, ఇతర శుభకార్యాలకు అనేక శుభ ముహూర్తాలు ఉన్నాయని పురోహితులు చెబుతున్నారు. నవంబరు 12 నుంచి 15 వరకు, 18 నుంచి 22 వరకు, 24 నుంచి 26 వరకు వివాహాలకు అనుకూలమైన ముహూర్తాలు ఉన్నట్లు తెలిపారు. డిసెంబరులో 2 నుంచి 4 వరకు, 10 నుంచి 13 వరకు, 15 నుంచి 19 వరకు, 22, 23 తేదీల్లో, అలాగే 27 నుంచి 31 వరకు శుభకార్యాలు నిర్వహించుకోవచ్చని పేర్కొన్నారు. పెళ్లిళ్ల సీజన్లో జిల్లావ్యాప్తంగా రోజుకు సుమారు రూ.కోటి నుంచి రూ.3 కోట్ల వరకు వ్యాపార లావాదేవీలు జరిగే అవకాశం ఉందని వ్యాపార వర్గాలు అంచనా వేస్తున్నాయి.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!