అచంచల భక్తి.. అపార శక్తి.. హనుమంతుడి గొప్పతనం ఇదే!

అచంచలమైన స్వామిభక్తి, అపారమైన బలం, అసాధారణమైన బుద్ధి, వినయం హనుమంతుని ప్రత్యేకతలు. శ్రీరామునిపై ఆయనకున్న భక్తి ప్రతి ఒక్కరికీ ఆదర్శం. పెద్దలను గౌరవించడం, దైవంపై విశ్వాసం కలిగి ఉండటం, మంచి నడవడికతో వ్యవహరించడం వంటి గుణాలు హనుమంతుని వ్యక్తిత్వంలో సహజంగా కనిపిస్తాయి. నవ వ్యాకరణాల్లో పాండిత్యం కలిగిన హనుమంతుడు స్పష్టమైన, అవసరమైనంత మాత్రమే మాట్లాడే వాక్పటిమకు ప్రతీక. సూర్యుని వద్ద విద్యాభ్యాసం చేసినప్పుడు ఆయన చూపిన వినయం, క్రమశిక్షణ, దీక్ష ప్రతి విద్యార్థికీ ఆదర్శంగా నిలుస్తాయి.

అప్పగించిన పనిని పూర్తిచేసే వరకు విశ్రమించని కార్యసాధకుడు హనుమంతుడు. సీతమ్మ జాడ కోసం నూరు యోజనాల సముద్రాన్ని దాటి లంకకు చేరుకోవడం, రావణుడి బలాన్ని అంచనా వేయడం, లంకను దహనం చేసి తిరిగి రావడం ఆయన కార్యదీక్షకు నిదర్శనం. మహాకార్యాలు సాధించినప్పటికీ వాటిని తన గొప్పతనంగా భావించకుండా శ్రీరాముని కృపగా భావించిన ఆయన వినయం అనుసరణీయం. యుద్ధంలో లక్ష్మణుడు మూర్ఛపోయినప్పుడు సంజీవని మూలికను గుర్తించలేక మొత్తం పర్వతాన్నే తీసుకువచ్చి ప్రాణాలు కాపాడిన తీరు ఆయన సమయస్ఫూర్తికి నిదర్శనం. హనుమంతుని నిజమైన భక్తి అంటే ఆయనను పూజించడమే కాకుండా ఆయనలోని వినయం, ధైర్యం, బుద్ధి, క్రమశిక్షణ, కార్యదీక్ష, సేవాభావాన్ని జీవితంలో ఆచరించడం.