షారుక్‌, అజయ్‌ దేవ్‌గణ్‌, టైగర్‌ ష్రాఫ్‌కు మహారాష్ట్ర ఎఫ్‌డీఏ నోటీసులు...

నిషేధిత పాన్‌ మసాలా ఉత్పత్తులకు పరోక్షంగా ప్రచారం చేశారన్న ఆరోపణలపై మహారాష్ట్ర ఆహార, ఔషధ పరిపాలన విభాగం (ఎఫ్‌డీఏ) బాలీవుడ్‌ నటులు షారుక్‌ ఖాన్‌, అజయ్‌ దేవ్‌గణ్‌, టైగర్‌ ష్రాఫ్‌లకు షోకాజ్‌ నోటీసులు జారీ చేసింది. విమల్‌ ఇలాయిచీ పేరుతో ప్రసారమవుతున్న ప్రకటనలు పాన్‌ మసాలా బ్రాండ్‌కు పరోక్ష ప్రచారం కల్పిస్తున్నాయా అనే అంశాన్ని ఎఫ్‌డీఏ పరిశీలిస్తోంది. ప్రచారంలో తమ పాత్ర, ఎండార్స్‌మెంట్‌ ఒప్పందాలు, క్యాంపెయిన్‌ వివరాలు తదితర సమాచారాన్ని సమర్పించాలని నటులను కోరింది.

ఈ వ్యవహారం రాష్ట్ర ఆహార నియంత్రణ సంస్థలకు ఉన్న అధికారాలు, సెలబ్రిటీలు చేసే బ్రాండ్‌ ఎండార్స్‌మెంట్లపై బాధ్యత వంటి అంశాలపై చర్చకు దారితీసింది. మహారాష్ట్ర ఎఫ్‌డీఏ కమిషనర్‌ తుకారం ముంఢే నిషేధిత గుట్కా, పాన్‌ మసాలా ఉత్పత్తులపై రాష్ట్రవ్యాప్తంగా చర్యలను ముమ్మరం చేశారు. అధికారిక వివరాల ప్రకారం, ఎఫ్‌డీఏ మహారాష్ట్రలో ఆహారం, ఔషధాలు, కాస్మెటిక్స్‌ భద్రత, నాణ్యత, నిబంధనల అమలును పర్యవేక్షించే ప్రధాన నియంత్రణ సంస్థగా ఉంది.