పాపన్న గౌడ్ చరిత్రను భావితరాలకు చాటిచెప్పాలి: పొన్నం ప్రభాకర్

సర్దార్ సర్వాయి పాపన్న గౌడ్ 376వ జయంతి సందర్భంగా హైదరాబాద్‌లోని మినిస్టర్ క్వార్టర్స్‌లో తెలంగాణ రవాణా, బీసీ సంక్షేమ శాఖ మంత్రి పొన్నం ప్రభాకర్ ‘సర్దార్ సర్వాయి పాపన్న గౌడ్’ సినిమా ట్రైలర్‌ను ఆవిష్కరించారు. ఈ సందర్భంగా పాపన్న గౌడ్ జీవిత చరిత్రకు సంబంధించిన పుస్తకంతో పాటు సినిమా పోస్టర్‌ను కూడా విడుదల చేశారు. ఈ చిత్రం ఆగస్టు 21న ప్రేక్షకుల ముందుకు రానుంది.

ఈ సందర్భంగా మంత్రి మాట్లాడుతూ.. బహుజన రాజ్యాన్ని స్థాపించి, మన ప్రాంతాన్ని మనమే పరిపాలించుకోవాలనే ఆలోచనతో సర్దార్ సర్వాయి పాపన్న గౌడ్ పోరాటం సాగించారని తెలిపారు. అనేక కోటలను జయించి గోల్కొండ వరకు తన ప్రభావాన్ని విస్తరించారని పేర్కొన్నారు. సామాజిక సమానత్వం, స్వయం పాలన, అణగారిన వర్గాల హక్కుల కోసం ఆయన చేసిన పోరాటం చరిత్రలో చిరస్థాయిగా నిలిచిందన్నారు. పాపన్న గౌడ్ చరిత్రను నేటి, భావితరాలకు పరిచయం చేయడంలో సినిమాలు, పుస్తకాలు కీలక పాత్ర పోషిస్తాయని అన్నారు. ఈ కార్యక్రమంలో తెలంగాణ ఫిలిం ఛాంబర్ అధ్యక్షుడు పతాని రామకృష్ణ, దర్శకుడు, నిర్మాత లింగంపల్లి వెంకటేష్ గౌడ్, డిస్ట్రిబ్యూటర్ పేపర్ సత్యనారాయణ తదితరులు పాల్గొన్నారు.