కార్గిల్ యుద్ధంలో నానా పటేకర్.. 60 రోజులు సైనికులతో కలిసి పనిచేసిన నటుడు!

విలక్షణ నటుడిగా భారతీయ సినీ పరిశ్రమలో ప్రత్యేక గుర్తింపు తెచ్చుకున్న నానా పటేకర్‌కు సైన్యంతోనూ ఓ ప్రత్యేక అనుబంధం ఉంది. 1999 కార్గిల్ యుద్ధ సమయంలో దేశానికి తన వంతు సహాయం చేయాలనే ఉద్దేశంతో ఆయన ఆర్మీతో కలిసి పనిచేయాలని నిర్ణయించుకున్నారు. ఇందుకోసం అప్పటి రక్షణ మంత్రి జార్జ్ ఫెర్నాండెజ్‌ను కలిసినట్లు గతంలో ఓ ఇంటర్వ్యూలో వెల్లడించారు. సాధారణ పౌరులు నేరుగా ఆర్మీలో చేరడం సాధ్యం కాదని ఫెర్నాండెజ్ చెప్పినప్పటికీ, తాను కమాండో కోర్సు పూర్తి చేశానని, ఆయుధాల వినియోగంలో అనుభవం ఉందని నానా పటేకర్ వివరించారు.

జాతీయ స్థాయి రైఫిల్ షూటింగ్ పోటీల్లో పాల్గొని కాంస్య పతకం సాధించిన విషయాన్ని కూడా ఆయన రక్షణ మంత్రికి తెలిపారు. ఆయన వివరాలు విన్న అనంతరం ఎప్పుడు వెళ్లడానికి సిద్ధంగా ఉన్నారని ఫెర్నాండెజ్ అడగగా, తాను సిద్ధంగా ఉన్నానని నానా పటేకర్ చెప్పినట్లు వెల్లడించారు. ఆ తర్వాత సుమారు 60 రోజుల పాటు ఆర్మీతో కలిసి పనిచేశారు. ద్రాస్, లెహ్, కుప్వారా, బారాముల్లా, సోపోర్ తదితర ప్రాంతాల్లో ఉన్నట్లు తెలిపారు. అయితే సైనికులతో కలిసి నిర్వహించిన కార్యకలాపాల వివరాలను మాత్రం ఆయన వెల్లడించలేదు. కార్గిల్‌కు వెళ్లే సమయంలో తన బరువు 76 కేజీలు ఉండగా, తిరిగి వచ్చేసరికి 56 కేజీలకు తగ్గిందని, ఆర్మీతో కలిసి పనిచేస్తున్న సమయంలో సమయమే తెలియలేదని నానా పటేకర్ గతంలో గుర్తుచేసుకున్నారు.