సౌదీకి పాకిస్తాన్‌ అండ.. హౌతీలపై పోరులో సత్తా చాటుతుందా?

2015లో హౌతీలపై పోరాటం కోసం సౌదీ అరేబియా పాకిస్తాన్‌ను యుద్ధ విమానాలు, నౌకలు, భూదళాలను పంపాలని కోరింది. దీనిపై పాకిస్తాన్‌ పార్లమెంట్‌లో ఐదు రోజులపాటు తీవ్ర చర్చ జరిగింది. యెమెన్‌లో సైన్యాన్ని మోహరిస్తే ప్రాంతీయ యుద్ధంలో పాక్‌ చిక్కుకునే ప్రమాదం ఉందని ప్రతిపక్షాలు హెచ్చరించాయి. చివరకు ఏప్రిల్‌ 10, 2015న పార్లమెంట్‌ ఏకగ్రీవంగా యెమెన్‌ యుద్ధంలో తటస్థంగా ఉండాలని నిర్ణయించింది. అయితే సౌదీ అరేబియా భౌగోళిక సమగ్రతకు లేదా మక్కా, మదీనా పవిత్ర ప్రాంతాలకు ముప్పు ఏర్పడితే రక్షణగా నిలుస్తామని హామీ ఇచ్చింది. ప్రస్తుతం సౌదీ-పాక్‌ సంబంధాలు మరింత బలపడటంతో పాటు సౌదీ అరేబియా, పాకిస్తాన్‌, టర్కీ మధ్య కుదిరిన సంయుక్త రక్షణ ఒప్పందం ప్రాధాన్యం సంతరించుకుంది. ఒక దేశంపై సాయుధ దాడిని మిగతా భాగస్వామ్య దేశాలపై దాడిగా పరిగణించే ఈ ఒప్పందం నేపథ్యంలో హౌతీల డ్రోన్లు, క్షిపణుల దాడులు కీలక పరీక్షగా మారాయి.

సౌదీ, పాకిస్తాన్‌, టర్కీలకు గణనీయమైన సైనిక సామర్థ్యం ఉన్నప్పటికీ యెమెన్‌లో హౌతీలను ఎదుర్కోవడం అంత సులభం కాదని నిపుణులు చెబుతున్నారు. ఉత్తర యెమెన్‌లోని పర్వతాలు, లోయలు, గుహలు, భూగర్భ స్థావరాలను హౌతీలు తమకు అనుకూలంగా ఉపయోగించుకుంటున్నారు. మొబైల్‌ క్షిపణి లాంచర్లు, డ్రోన్లు, వికేంద్రీకృత కమాండ్‌ వ్యవస్థతో వారు దాడులు కొనసాగిస్తున్నారు. 2015 నుంచి సౌదీ నేతృత్వంలోని కూటమి, అలాగే అమెరికా, బ్రిటన్‌ హౌతీ స్థావరాలపై వైమానిక దాడులు చేసినా వారి డ్రోన్లు, క్షిపణుల సామర్థ్యాన్ని పూర్తిగా నిర్వీర్యం చేయలేకపోయాయి. దీంతో పాక్‌, టర్కీ సహకారం సౌదీ వైమానిక రక్షణ, నిఘా వ్యవస్థలు, ఎర్ర సముద్ర భద్రత, యెమెన్‌ ప్రభుత్వ దళాలకు మద్దతు వంటి పరిమిత లక్ష్యాలకే పరిమితం కావచ్చనే అంచనాలు ఉన్నాయి. పూర్తి స్థాయి భూ యుద్ధంలోకి దిగడం మాత్రం మరింత సంక్లిష్టతకు దారితీసే అవకాశం ఉంది. 2015లో తటస్థంగా ఉన్న పాకిస్తాన్‌ ఇప్పుడు సౌదీ రక్షణలో కీలక పాత్ర పోషించే పరిస్థితి ఏర్పడినా, హౌతీల సమస్యకు కేవలం సైనిక బలంతో శాశ్వత పరిష్కారం సాధించడం కష్టమేనని విశ్లేషకులు భావిస్తున్నారు.