పరవాడ ఫార్మాసిటీ కాలుష్యంపై పవన్‌ స్పందన

పరవాడ ఫార్మాసిటీలో నల్లటి నీరు, దుర్వాసన వస్తున్నాయంటూ వచ్చిన ఫిర్యాదులతో పాటు దీనికి సంబంధించిన వీడియోపై ఆంధ్రప్రదేశ్‌ ఉప ముఖ్యమంత్రి పవన్ కళ్యాణ్ స్పందించారు. దీంతో ఆంధ్రప్రదేశ్‌ కాలుష్య నియంత్రణ మండలి అధికారులు ఫార్మాసిటీలో క్షేత్రస్థాయి పరిశీలన చేపట్టి వ్యర్థజలాల నమూనాలను సేకరించారు. 95 పరిశ్రమలకు షోకాజ్‌ నోటీసులు జారీ చేసి, వ్యర్థజలాలను కాలువల్లోకి విడుదల చేయవద్దని ఆదేశించారు.

ప్రమాదకర వ్యర్థాలను శాస్త్రీయ పద్ధతిలో నిర్వహించాలని, పరిశ్రమల్లో ఆన్‌లైన్‌ పర్యవేక్షణను తప్పనిసరి చేయాలని కాలుష్య నియంత్రణ మండలి సూచించింది. వ్యర్థాల నిర్వహణ వ్యవస్థను డిజిటలీకరించడంతో పాటు నిరంతర పర్యవేక్షణను బలోపేతం చేయాలని అధికారులను ఆదేశించింది. పర్యావరణ నిబంధనలను ఉల్లంఘించే పరిశ్రమలపై చర్యలు తప్పవని స్పష్టం చేసింది. చేపట్టిన పరిశీలన, తదుపరి చర్యలకు సంబంధించిన నివేదికను డిప్యూటీ సీఎం కార్యాలయానికి సమర్పించినట్లు సమాచారం.