ప్రకృతి, ప్రజలు, ప్రగతి సమన్వయమే పవన్ కళ్యాణ్ విధానం

ప్రకృతి పరిరక్షణ, ప్రజల ఉపాధి, పర్యాటక అభివృద్ధిని సమన్వయం చేసే దిశగా ఆంధ్రప్రదేశ్‌లో నగరవనాలు, ఎకో టూరిజం ప్రాజెక్టులు రూపుదిద్దుకుంటున్నాయని ఏపీ గ్రీన్ ఎగ్జిక్యూటివ్ కమిటీ ఛైర్మన్ నాగబాబు తెలిపారు. మంగళవారం మంగళగిరిలోని ఉప ముఖ్యమంత్రి పవన్ కళ్యాణ్ క్యాంపు కార్యాలయం నుంచి 6 నగరవనాలు, 3 ఎకో టూరిజం ప్రాజెక్టులను వర్చువల్‌గా ప్రారంభించారు. బాపట్ల, చీరాల, కోటప్పకొండ, వినుకొండ, పిడుగురాళ్ల, మాచర్లలో 304.60 హెక్టార్లలో అభివృద్ధి చేసిన నగరవనాలు పట్టణ ప్రజలకు పచ్చదనం, స్వచ్ఛమైన గాలి, ఆహ్లాదకరమైన వాతావరణాన్ని అందించే హరిత కేంద్రాలుగా తీర్చిదిద్దినట్లు తెలిపారు.

వెలుగోడులో నల్లమల జంగిల్ సఫారీ, మారేడుమిల్లిలో ట్రెక్కింగ్ మార్గం, రూ.1 కోటి వ్యయంతో అభివృద్ధి చేసిన అరోమా కెనపీ వాక్ వంటి ప్రాజెక్టులు ఎకో టూరిజానికి కొత్త ఆకర్షణలుగా నిలవనున్నాయని నాగబాబు పేర్కొన్నారు. నల్లమల జంగిల్ సఫారీ ద్వారా 80కి పైగా గ్రామీణ కుటుంబాలకు ప్రత్యక్ష ఉపాధి అవకాశాలు లభించనున్నాయని తెలిపారు. మారేడుమిల్లిలో గిరిజన యువత ట్రెక్కింగ్ గైడ్‌లుగా పనిచేసే అవకాశం కల్పించడంతో పాటు కాఫీ తోటల మధ్య ఎలివేటెడ్ కెనపీ వాక్, కాఫీ కేఫ్, బర్డ్ నెస్ట్ వంటి సౌకర్యాలను ఏర్పాటు చేసినట్లు వివరించారు. అడవులను పరిరక్షిస్తూ స్థానిక ప్రజలకు ఉపాధి కల్పించడం, పర్యాటకాన్ని అభివృద్ధి చేయడం ఈ ప్రాజెక్టుల ప్రధాన లక్ష్యమని తెలిపారు.