గణనాథుడి మహా నిమజ్జనానికి ట్యాంక్‌బండ్‌పై ఏర్పాట్లు షురూ

మహా నిమజ్జనం నేపథ్యంలో హుస్సేన్‌సాగర్ వద్ద ట్యాంక్‌బండ్‌పై ఏర్పాట్లు ప్రారంభమయ్యాయి. వినాయక విగ్రహాల నిమజ్జనం కోసం మంగళవారం ట్యాంక్‌బండ్‌పై 15 క్రేన్లను ఏర్పాటు చేశారు. తొలుత ట్యాంక్‌బండ్‌పై విగ్రహాల నిమజ్జనానికి అనుమతి లేదంటూ జీహెచ్‌ఎంసీ అధికారులు ఫ్లెక్సీలు, పోస్టర్లు ఏర్పాటు చేయడంతో పాటు బ్యారికేడ్లు పెట్టారు. అయితే హుస్సేన్‌సాగర్‌లో గతంలో మాదిరిగానే నిమజ్జనానికి అనుమతించాలని భాగ్యనగర్ గణేశ్ ఉత్సవ సమితి డిమాండ్ చేసింది. సోమవారం ట్యాంక్‌బండ్‌కు చేరుకున్న సమితి ప్రతినిధులు ప్రభుత్వ విభాగాలు ఏర్పాటు చేసిన ఫ్లెక్సీలు, బ్యారికేడ్లను తొలగించడంతో అక్కడ కొంత ఉద్రిక్తత నెలకొంది.

ఈ పరిణామాల నేపథ్యంలో జీహెచ్‌ఎంసీ ట్యాంక్‌బండ్‌పై నిమజ్జనానికి అవసరమైన ఏర్పాట్లు చేపట్టింది. ఈ నెల 25న జరగనున్న మహానిమజ్జనం సందర్భంగా భారీ సంఖ్యలో విగ్రహాలు తరలిరానున్న నేపథ్యంలో 15 క్రేన్లను ఏర్పాటు చేశారు. దీంతో నిమజ్జన ప్రక్రియకు ఎలాంటి ఆటంకాలు లేకుండా ఏర్పాట్లు పూర్తవుతాయని భాగ్యనగర్ గణేశ్ ఉత్సవ సమితి ప్రతినిధులు తెలిపారు. బుధవారం లేదా గురువారం నుంచి ట్యాంక్‌బండ్‌పై నిమజ్జనానికి అనుమతి ఇచ్చే అవకాశం ఉందని సంబంధిత అధికారులు చెబుతున్నారు. కాగా, వినాయక చవితి మరుసటి రోజు నుంచే ఎన్టీఆర్ మార్గ్, పీపుల్స్ ప్లాజా వద్ద నిమజ్జనాలు కొనసాగుతున్నాయి.