ఢిల్లీ ర్యాలీకి వచ్చే వారికి రాహుల్ గాంధీ ప్రత్యేక విజ్ఞప్తి

నవంబర్ 1న ఢిల్లీలోని రాంలీలా మైదాన్‌లో ఇండియా కూటమి భారీ నిరసన ర్యాలీ నిర్వహిస్తోంది. ఓటర్ల జాబితా సవరణలో అక్రమాలు జరిగాయన్న ఆరోపణలకు నిరసనగా ఈ కార్యక్రమాన్ని చేపడుతున్నారు. ఈ నేపథ్యంలో కాంగ్రెస్ అగ్రనేత రాహుల్ గాంధీ ర్యాలీకి హాజరయ్యేందుకు ఢిల్లీకి వచ్చే వారికి ప్రత్యేక విజ్ఞప్తి చేశారు. నిరసన కార్యక్రమంలో పాల్గొనడంతో పాటు స్థానిక మార్కెట్లకు వెళ్లి చిన్న వ్యాపారుల వద్ద కొనుగోళ్లు చేయాలని కోరారు. పండుగల సీజన్‌లో స్థానిక వ్యాపారులకు అండగా నిలవాలని ఆయన సూచించారు. ర్యాలీ వల్ల పండుగల సమయంలో వ్యాపారం దెబ్బతినే అవకాశం ఉందని కొందరు వ్యాపారులు ఆందోళన వ్యక్తం చేసిన నేపథ్యంలో రాహుల్ ఈ విజ్ఞప్తి చేశారు.

ఓటర్ల జాబితా సవరణ ప్రక్రియలో అక్రమాలు జరిగాయంటూ ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని ఇండియా కూటమి డిమాండ్ చేస్తోంది. ప్రకటించిన కార్యక్రమం ప్రకారం మధ్యాహ్నం 12 గంటలకు మింటో రోడ్–కనాట్ ప్లేస్ జంక్షన్ నుంచి నిరసన మార్చ్ ప్రారంభమై రాంలీలా మైదాన్‌కు చేరుకోనుంది. భారీగా ప్రజలు తరలివచ్చే అవకాశం ఉండటంతో ఢిల్లీలో భద్రతను కట్టుదిట్టం చేశారు. ర్యాలీ నేపథ్యంలో పోలీసులతో పాటు ఇతర భద్రతా బలగాలను కూడా మోహరించారు.