రాజ్‌పాల్ యాదవ్‌కు సుప్రీంకోర్టు సూచన.. ఇలా కంబ్యాక్ ఇవ్వండి!

బాలీవుడ్‌లో తన కామెడీతో ప్రత్యేక గుర్తింపు తెచ్చుకున్న నటుడు రాజ్‌పాల్ యాదవ్ ప్రస్తుతం చెక్ బౌన్స్ కేసుల కారణంగా కోర్టు వ్యవహారాలను ఎదుర్కొంటున్నారు. ఈ కేసు విచారణలో భాగంగా సుప్రీంకోర్టుకు హాజరైన ఆయన తన ఆర్థిక పరిస్థితిని వివరించే ప్రయత్నం చేశారు. ఆయన మాటలు విన్న చీఫ్ జస్టిస్ సూర్యకాంత్ ఆసక్తికరంగా స్పందిస్తూ మంచి సినిమా తీసి మళ్లీ ప్రేక్షకులను ఎంటర్‌టైన్ చేయాలని, తద్వారా తన ఇమేజ్‌ను తిరిగి నిర్మించుకోవాలని సూచించినట్లు తెలుస్తోంది. అంతేకాదు, తమ వద్ద కూడా మంచి నటులైన న్యాయవాదులు ఉన్నారని, వారితో కలిసి సినిమా చేయవచ్చని సరదాగా వ్యాఖ్యానించారు.

ఈ చెక్ బౌన్స్ కేసులు రాజ్‌పాల్ యాదవ్ దర్శకత్వం వహించిన అటా పటా లాపటా సినిమా కోసం తీసుకున్న ఆర్థిక సహాయానికి సంబంధించినవి. కేసు వివరాల ప్రకారం, మురళీ ప్రాజెక్ట్స్ ప్రైవేట్ లిమిటెడ్ నుంచి ఆయన ఆర్థిక సహాయం తీసుకున్నారని, అనంతరం తిరిగి చెల్లింపు కోసం ఇచ్చిన చెక్కులు బౌన్స్ కావడంతో వివాదం కోర్టుకు చేరింది. ఇప్పటివరకు తాను 200 నుంచి 250 సినిమాల్లో నటించానని, గత 13 ఏళ్లలో దాదాపు రూ.200–250 కోట్ల వరకు నష్టపోయానని రాజ్‌పాల్ యాదవ్ కోర్టుకు తెలిపారు. అటా పటా లాపటా సినిమా వల్ల సుమారు రూ.17 కోట్ల నష్టం వచ్చిందని, భారీ స్థాయిలో విడుదల కావాల్సిన ఈ సినిమా చివరకు థియేటర్లలో విడుదల కాలేదని చెప్పారు. ఈ వ్యవహారంలో ఇప్పటికే రూ.1.15 కోట్లు చెల్లించినట్లు ఆయన తరఫు న్యాయవాదులు తెలిపారు. పూర్వీకుల ఆస్తిని విక్రయించి మరో రూ.85 లక్షలను సుప్రీంకోర్టు రిజిస్ట్రీలో జమ చేసేందుకు ప్రయత్నిస్తున్నట్లు వెల్లడించారు. అయితే రాజ్‌పాల్ యాదవ్ వ్యవహారశైలిపై కోర్టు అసంతృప్తి వ్యక్తం చేస్తూ, పరిష్కారానికి పరిమిత సమయం మాత్రమే ఇస్తున్నట్లు స్పష్టం చేసింది.