ఆల్ఫారెట్టాలో తానా, తామా మట్టి వినాయక వర్క్‌షాప్

ఉత్తర అమెరికా తెలుగు సంఘం (తానా), మెట్రో అట్లాంటా తెలుగు సంఘం (తామా) ఆధ్వర్యంలో సెప్టెంబర్ 12న జార్జియాలోని ఆల్ఫారెట్టా డిసానా మిడిల్ స్కూల్‌లో మట్టి వినాయక విగ్రహాల తయారీ వర్క్‌షాప్‌ను నిర్వహించారు. సాంప్రదాయం, సృజనాత్మకత, పర్యావరణ స్పృహ, సమాజ స్ఫూర్తిని ఒకే వేదికపైకి తీసుకొచ్చిన ఈ కార్యక్రమంలో పిల్లలు, కుటుంబ సభ్యులతో కలిపి 150 మందికి పైగా పాల్గొన్నారు. ClayGanesha.org భాగస్వామ్యంతో నిర్వహించిన వర్క్‌షాప్‌లో పర్యావరణహిత విత్తన వినాయక విగ్రహాల తయారీపై అవగాహన కల్పించారు.

“సేవా భావంతో భక్తి - నాటండి, పూలు వికసించడాన్ని చూడండి!” అనే ఇతివృత్తంతో సహజమైన మట్టిలో విత్తనాలను కలిపి వినాయక విగ్రహాలను తయారు చేశారు. గణేష్ చతుర్థి వేడుకల అనంతరం ఈ విగ్రహాలను నాటితే వాటి నుంచి మొక్కలు పెరిగి పూలు పూస్తాయని నిర్వాహకులు వివరించారు. ముఖర్జీ వేములపల్లి కార్యక్రమానికి నాయకత్వం వహించి సమన్వయం చేశారు. బాబీ భార్య సౌజన్య ఆరేకపల్లి, వారి ఇద్దరు పిల్లలు కూడా కార్యక్రమంలో చురుగ్గా పాల్గొన్నారు. శ్రీనివాస్ రామానాథం, యశ్వంత్ జొన్నలగడ్డ, వినయ్ మద్దినేని, పార్వతి కొంపెల్ల, చైతన్య కొర్రపాటి తదితరులు తానా, తామా బృందాలతో కలిసి కార్యక్రమ నిర్వహణకు సహకరించారు.

కుటుంబాలకు కేటాయించిన సమయాల ప్రకారం కార్యక్రమానికి హాజరు కావడంతో వర్క్‌షాప్ రోజంతా ఉత్సాహంగా సాగింది. విరాళాలు అందించి కార్యక్రమానికి మద్దతు ఇచ్చిన సునీల్ దేవరపల్లికి నిర్వాహకులు ప్రత్యేక అభినందనలు తెలిపారు. తానా వైస్ ప్రెసిడెంట్ శ్రీనివాస్ లావు, తామా అధ్యక్షురాలు సునీత పొట్నూరు, తామా ఛైర్మన్ మధుకర్ యార్లగడ్డ, ప్రాంతీయ ప్రతినిధి శేఖర్ కొల్లు, సోషల్ వెల్ఫేర్ కోఆర్డినేటర్ సునీల్ దేవరపల్లి, బోర్డు డైరెక్టర్ భరత్ మద్దినేని, వుమెన్ సర్వీసెస్ కోఆర్డినేటర్ కార్యదర్శి సోహిని అయినాల తదితరులు కార్యక్రమం విజయవంతానికి సహకరించారు. సంప్రదాయాలను కొనసాగిస్తూనే భావితరాల్లో పర్యావరణ బాధ్యత, సృజనాత్మకత, సమాజ సేవపై అవగాహన పెంచడమే కార్యక్రమం లక్ష్యంగా నిలిచింది.