తెలంగాణ విద్యుత్‌ వినియోగదారులకు షాక్‌..

తెలంగాణ విద్యుత్‌ నియంత్రణ మండలి (టీజీఈఆర్‌సీ) రాష్ట్రంలోని రెండు విద్యుత్‌ పంపిణీ సంస్థలు (డిస్కంలు) వ్యవసాయేతర విద్యుత్‌ వినియోగదారుల నుంచి రూ.5,420.23 కోట్ల ట్రూ-అప్‌ ఛార్జీలను వసూలు చేసేందుకు అనుమతించింది. 2022-23లో విద్యుత్‌ కొనుగోలుకు అదనంగా చేసిన వ్యయం, 2023-24లో ఏర్పడిన రెవెన్యూ లోటును కలిపి మొత్తం రూ.7,635.22 కోట్లను వసూలు చేసేందుకు డిస్కంలు అనుమతి కోరాయి. బహిరంగ విచారణ అనంతరం వ్యవసాయ రంగానికి సంబంధించిన రూ.2,214.99 కోట్లను రాష్ట్ర ప్రభుత్వం నుంచి రాబట్టాలని, మిగిలిన రూ.5,420.23 కోట్లను వ్యవసాయేతర వినియోగదారుల నుంచి వసూలు చేయాలని ఈఆర్‌సీ ఆదేశించింది. రైతు డిస్కం ఏర్పాటవుతున్న నేపథ్యంలో పిటిషన్లపై కొంతకాలం ఉత్తర్వులు నిలిపివేయాలన్న ప్రభుత్వ విజ్ఞప్తి నేపథ్యంలో ఆలస్యమైన ఈ వ్యవహారంపై ఇటీవల సుప్రీంకోర్టు తీర్పు నేపథ్యంలో తుది ఆదేశాలు వెలువడ్డాయి.

వచ్చే నెల నుంచి జారీ చేసే విద్యుత్‌ బిల్లుల నుంచే ట్రూ-అప్‌ ఛార్జీల వసూలు ప్రారంభించాలని డిస్కంలను టీజీఈఆర్‌సీ ఆదేశించింది. దక్షిణ తెలంగాణ డిస్కం పరిధిలో 29 నెలలు, ఉత్తర తెలంగాణ డిస్కం పరిధిలో 26 నెలలపాటు ఈ ఛార్జీలు వసూలు చేయనున్నారు. మొదటి నెల బిల్లులో యూనిట్‌కు 30 పైసలు, ఆ తర్వాత నెల నుంచి యూనిట్‌కు 50 పైసలు చొప్పున వసూలు చేయాలని నిర్ణయించారు. ఉచిత విద్యుత్‌ పథకం అమల్లో ఉన్నందున వ్యవసాయ వినియోగదారులపై నేరుగా ఈ ఛార్జీలు విధించరు. ప్రతి నెల బిల్లులో ట్రూ-అప్‌ ఛార్జీని ప్రత్యేకంగా చూపడంతో పాటు, అది ఏ ఆర్థిక సంవత్సరానికి సంబంధించినదో, నెలవారీ వినియోగం ఎంత, యూనిట్‌ రేటు ఎంత అనే వివరాలను స్పష్టంగా పేర్కొనాలి. డిస్కంల విద్యుత్‌ కొనుగోలు వ్యయం అంచనాలను మించినప్పుడు లేదా ఆదాయం అంచనాల కంటే తగ్గినప్పుడు ఏర్పడే లోటును భర్తీ చేసేందుకు వసూలు చేసే ఛార్జీలనే ట్రూ-అప్‌ ఛార్జీలుగా పిలుస్తారు.