జమ్మూకశ్మీర్‌లో ఉగ్రదాడి కలకలం..

జమ్మూకశ్మీర్‌లోని కుల్గామ్ జిల్లాలో భద్రతా బలగాల తనిఖీ కేంద్రం వద్ద కాల్పుల ఘటన చోటుచేసుకుంది. ప్రాథమిక సమాచారం ప్రకారం, బైక్‌పై వచ్చిన ఇద్దరు సాయుధులు నాకా పాయింట్ వద్ద విధులు నిర్వహిస్తున్న సెంట్రల్ రిజర్వ్ పోలీస్ ఫోర్స్ (సీఆర్‌పీఎఫ్) జవాన్లపై ఆకస్మికంగా కాల్పులు జరిపారు. మధ్యాహ్నం సుమారు 2:15 గంటల సమయంలో జవాన్లు వాహన తనిఖీలు చేస్తుండగా ఈ ఘటన జరిగినట్లు తెలుస్తోంది. కాల్పుల అనంతరం దుండగులు అక్కడి నుంచి పరారయ్యారు. ఈ ఘటనలో ఇద్దరు సీఆర్‌పీఎఫ్ జవాన్లు గాయపడినట్లు ప్రాథమిక సమాచారం అందింది. తోటి సిబ్బంది వెంటనే వారిని చికిత్స కోసం అనంతనాగ్ జిల్లా ఆసుపత్రికి తరలించారు.

దాడి సమాచారం అందుకున్న అదనపు భద్రతా బలగాలు సంఘటనా స్థలానికి చేరుకుని పరిసర ప్రాంతాలను తమ ఆధీనంలోకి తీసుకున్నాయి. నిందితులను గుర్తించి పట్టుకునేందుకు సీఆర్‌పీఎఫ్, జమ్మూకశ్మీర్ పోలీసులు సంయుక్తంగా గాలింపు చర్యలు ప్రారంభించారు. ప్రధాన రహదారులతో పాటు అంతర్గత మార్గాల్లోనూ తనిఖీలు చేపడుతున్నారు. చెక్‌పోస్టుల వద్ద వాహనాల పరిశీలనను మరింత కట్టుదిట్టం చేశారు. గాయపడిన జవాన్లకు వైద్యులు చికిత్స అందిస్తున్నారు. ఈ ఘటన నేపథ్యంలో కుల్గామ్, అనంతనాగ్ జిల్లాల్లో భద్రతను పెంచి, పరిస్థితిని అధికారులు ఎప్పటికప్పుడు సమీక్షిస్తున్నారు.