అన్‌అకాడమీ సహ వ్యవస్థాపకులు గౌరవ్‌ ముంజాల్‌, రోమన్‌ సైనీ ప్రారంభ దశలో ఉన్న కృత్రిమ మేధ (ఏఐ), డీప్‌టెక్‌ స్టార్టప్‌లలో పెట్టుబడులు పెట్టేందుకు రూ.700 కోట్ల వెంచర్‌ క్యాపిటల్‌ ఫండ్‌ను సమీకరిస్తున్నట్లు ది ఎకనామిక్‌ టైమ్స్‌ కథనం వెల్లడించింది. ‘లాంగ్‌షాట్‌ క్యాపిటల్‌’ పేరుతో ఏర్పాటు చేస్తున్న ఈ ఫండ్‌ కేటగిరీ-II ఆల్టర్నేటివ్‌ ఇన్వెస్ట్‌మెంట్‌ ఫండ్‌ (AIF)గా నమోదైనట్లు సమాచారం. ఇప్పటివరకు సుమారు రూ.250–300 కోట్ల పెట్టుబడి హామీలు లభించినట్లు నివేదిక పేర్కొంది. 2027 జనవరిలో తొలి విడత నిధుల సమీకరణను పూర్తి చేయాలని లక్ష్యంగా పెట్టుకున్నప్పటికీ, పెట్టుబడిదారులతో చర్చలను బట్టి మొత్తం, గడువులో మార్పులు ఉండవచ్చని తెలిపింది.

ఈ ఫండ్‌ ద్వారా సీడ్‌, ప్రీ-సిరీస్‌ ఏ దశల్లో ఉన్న 25–28 స్టార్టప్‌లకు పెట్టుబడులు అందించాలని వ్యవస్థాపకులు భావిస్తున్నట్లు నివేదిక పేర్కొంది. ఒక్కో సంస్థలో 5 లక్షల నుంచి 15 లక్షల డాలర్ల వరకు పెట్టుబడి పెట్టి, ఆయా కంపెనీల్లో 8–12 శాతం వాటాను పొందాలని లక్ష్యంగా పెట్టుకున్నట్లు సమాచారం. అప్‌గ్రాడ్‌ సంస్థ యూన్‌అకాడమీని పూర్తిగా షేర్ల మార్పిడి ద్వారా కొనుగోలు చేసిన రెండు నెలల్లోపే ఈ ఫండ్‌ ప్రణాళిక తెరపైకి రావడం గమనార్హం. ఈ ఫండ్‌ కార్యాచరణ ప్రారంభమైతే, భారత్‌లో ఏఐ, అధునాతన సాంకేతికతల రంగాల్లో పనిచేసే కొత్త స్టార్టప్‌లకు పెట్టుబడుల మద్దతు లభించే అవకాశం ఉంటుంది.