కుబేరులపై మరింత పన్ను విధించాలి - యునైటెడ్ ఎయిర్‌లైన్స్ సీఈఓ

అమెరికాలో పెరుగుతున్న ఆదాయ, సంపద అసమానతల నేపథ్యంలో సంపన్నులపై అధిక పన్నులు విధించాలనే చర్చ మరోసారి తెరపైకి వచ్చింది. ఈ అంశంపై యునైటెడ్ ఎయిర్‌లైన్స్ సీఈఓ స్కాట్ కిర్బీ కూడా తన అభిప్రాయాన్ని వెల్లడించారు. తనలాంటి సంపన్నుల నుంచి మరింత పన్ను వసూలు చేయాలని, ఇందుకోసం జాతీయ స్థాయిలో సంపద పన్ను విధానాన్ని తీసుకురావాలని సూచించారు. ది న్యూయార్క్ టైమ్స్కు ఇచ్చిన ఇంటర్వ్యూలో మాట్లాడుతూ.. సంపద అసమానతలు సమాజానికి ముప్పుగా మారుతున్నాయని, వాటిని పరిష్కరించేందుకు విధానపరమైన చర్యలు అవసరమని పేర్కొన్నారు. సంపద పన్నును రాష్ట్రాల వారీగా కాకుండా దేశవ్యాప్తంగా ఒకే విధంగా అమలు చేయాలని అన్నారు. లేదంటే పన్నులు తక్కువగా ఉన్న రాష్ట్రాలకు సంపన్నులు వలస వెళ్లే అవకాశం ఉందని అభిప్రాయపడ్డారు.

వేతనాలపై ఆధారపడి జీవించే ఉద్యోగులపై పన్ను భారాన్ని తగ్గించాలంటే సంపన్నుల నుంచి ఎక్కువ పన్నులు వసూలు చేయాలని కిర్బీ సూచించారు. వారసత్వంగా లభించే ఆస్తులపై కూడా కొన్ని స్థాయిల్లో దాదాపు 100 శాతం వరకు పన్ను విధించాలని, అలాంటి పన్నును తాను కూడా చెల్లించేందుకు సిద్ధంగా ఉన్నానని చెప్పారు. ఆయన వ్యాఖ్యలు సొంత వేతన ప్యాకేజీ నేపథ్యంలో మరింత చర్చకు దారితీశాయి. యునైటెడ్ ఎయిర్‌లైన్స్ 2025 ప్రాక్సీ నివేదిక ప్రకారం, ఆ ఏడాది కిర్బీకి మొత్తం 32.28 మిలియన్ డాలర్ల పారితోషికం అందగా, సంస్థలో మధ్యస్థ స్థాయి ఉద్యోగి వార్షిక మొత్తం పారితోషికం 96,670 డాలర్లుగా నమోదైంది. మరోవైపు, ఫెడరల్ రిజర్వ్ గణాంకాల ప్రకారం 2026 రెండో త్రైమాసికంలో అమెరికా మొత్తం నికర సంపదలో 32.5 శాతం వాటా అత్యంత సంపన్నులైన ఒక శాతం కుటుంబాల వద్ద ఉంది. ఈ గణాంకాలు అమెరికాలో సంపద కేంద్రీకరణపై కొనసాగుతున్న చర్చకు మరింత ప్రాధాన్యతనిస్తున్నాయి.