ఐమెక్‌కు అమెరికా పూర్తి మద్దతు-ట్రంప్‌

అమెరికా అధ్యక్షుడు డొనాల్డ్‌ ట్రంప్‌ భారత్‌ నుంచి పశ్చిమాసియా మీదుగా ఐరోపాను అనుసంధానించే ఇండియా–మిడిల్‌ ఈస్ట్‌–యూరప్‌ ఎకనామిక్‌ కారిడార్‌ (ఐమెక్‌)కు మద్దతు ప్రకటించారు. ఐక్యరాజ్యసమితి సాధారణ సభకు అనుబంధంగా జరిగిన సమావేశంలో గల్ఫ్‌ కోఆపరేషన్‌ కౌన్సిల్‌ సభ్యులతో భేటీ అయిన సందర్భంగా ట్రంప్‌ ఈ వ్యాఖ్యలు చేశారు. ఇరాన్‌ ప్రభావం ఉన్న ప్రాంతాలకు దూరంగా పశ్చిమాసియా ఇంధన మౌలిక వసతులను ఏర్పాటు చేయాల్సిన అవసరం ఉందని ఆయన పేర్కొన్నారు.

చమురు, ఇతర ఇంధన వనరులను పైప్‌లైన్లు లేదా ప్రత్యామ్నాయ మార్గాల ద్వారా ఆ ప్రాంతం నుంచి బయటకు తరలించేందుకు అమెరికా ప్రభుత్వం ఐమెక్‌తో పాటు ఇతర మార్గాలకు పూర్తి మద్దతు ఇస్తుందని ట్రంప్‌ తెలిపారు. 2023 సెప్టెంబర్‌లో దిల్లీలో జరిగిన జీ20 శిఖరాగ్ర సమావేశంలో ఐమెక్‌ను ప్రకటించారు. భారత్‌, పశ్చిమాసియా, ఐరోపాలను రైలు, సముద్ర మార్గాలు, ఇంధన మౌలిక వసతులు, డేటా నెట్‌వర్క్‌ల ద్వారా అనుసంధానించే బహుముఖ రవాణా, కనెక్టివిటీ ప్రాజెక్టుగా ఐమెక్‌ను రూపొందించారు.