కెప్టెన్‌ స్మిత్‌ మచ్చర్‌ ధైర్యానికి అమెరికా ప్రతినిధుల సభ గౌరవం

ఫ్లైదుబాయ్‌ విమానం ఎఫ్‌జెడ్‌1073లో జరిగిన దాడిని అడ్డుకోవడంలో ధైర్యసాహసాలు ప్రదర్శించిన భారతీయ కెప్టెన్‌ స్మిత్‌ మచ్చర్‌ను గౌరవిస్తూ అమెరికా ప్రతినిధుల సభలో ద్వైపాక్షిక తీర్మానం ప్రవేశపెట్టారు. అక్టోబర్‌ 5న ప్రవేశపెట్టిన ఈ తీర్మానంలో కాక్‌పిట్‌లో దాడికి గురై తీవ్రంగా గాయపడినప్పటికీ స్మిత్‌ మచ్చర్‌ ప్రదర్శించిన అసాధారణ ధైర్యాన్ని ప్రశంసించారు. ఆయన కాక్‌పిట్‌ తలుపు తెరవడంతో విమానంలోని ఇతర పైలట్లు, సిబ్బంది, ప్రయాణికులు జోక్యం చేసుకుని దాడి చేసిన వ్యక్తిని అదుపులోకి తీసుకోవడంలో సహకరించారు.

విమానాన్ని సురక్షితంగా దింపడంలో సహకరించిన ఇతర పైలట్లు, క్యాబిన్‌ సిబ్బంది, ప్రయాణికుల సేవలను కూడా తీర్మానం ప్రశంసించింది. ఈ ఘటనను అంతర్జాతీయ పౌర విమానయాన భద్రతపై ఉగ్రవాద చర్యగా ఖండిస్తూ, సౌదీ అరేబియా, యూఏఈ ప్రభుత్వాలు సమగ్రంగా, వేగంగా దర్యాప్తు చేయాలని కోరింది. ప్రస్తుతం ఈ తీర్మానం అమెరికా ప్రతినిధుల సభ విదేశీ వ్యవహారాల కమిటీ పరిశీలనకు వెళ్లింది.