వైట్‌హౌస్ ప్రెస్ సెక్రటరీ కరోలిన్ లెవిట్ రాజీనామా

అమెరికా అధ్యక్షుడు డొనాల్డ్ ట్రంప్ ప్రభుత్వంలో కీలక పరిణామం చోటుచేసుకుంది. వైట్‌హౌస్ ప్రెస్ సెక్రటరీ కరోలిన్ లెవిట్ తన పదవి నుంచి తప్పుకుంటున్నట్లు అధ్యక్షుడు ట్రంప్ బుధవారం ప్రకటించారు. అయితే, ఆమె ట్రంప్‌కు సీనియర్ సలహాదారుగా కొనసాగుతారని స్పష్టం చేశారు. 28 ఏళ్ల వయసులో వైట్‌హౌస్ ప్రెస్ సెక్రటరీగా బాధ్యతలు చేపట్టి, అతి పిన్న వయస్కురాలిగా లెవిట్ రికార్డు సృష్టించారు. పత్రికా సమావేశాల్లో జర్నలిస్టులపై తనదైన శైలిలో దూకుడుగా వ్యవహరించడంలో, ట్రంప్‌ను బలంగా సమర్థించడంలో ఆమెకు ప్రత్యేక గుర్తింపు ఉంది.

ఈ విషయంపై ట్రంప్ సోషల్ మీడియాలో స్పందిస్తూ.. "మా అద్భుతమైన ప్రెస్ సెక్రటరీ, నాకు అత్యంత విశ్వసనీయ సహాయకుల్లో ఒకరైన కరోలిన్ లెవిట్.. తన పిల్లలు, కుటుంబంతో ఎక్కువ సమయం గడిపేందుకు ఈ నెల చివర్లో పదవి నుంచి వైదొలగుతున్నారు. ఇకపై ఆమె నా ముఖ్య సలహాదారుల్లో ఒకరిగా, రిపబ్లికన్ పార్టీలో ప్రభావవంతమైన గొంతుకగా ఉంటారు" అని పేర్కొన్నారు. తన నిష్క్రమణపై లెవిట్ కూడా స్పందించారు. "అధ్యక్షుడి తరఫున మాట్లాడే గొప్ప అవకాశాన్నిచ్చినందుకు ఆయనకు కృతజ్ఞతలు. లిబరల్ మీడియాను జవాబుదారీగా నిలబెట్టడం, ట్రంప్ విజయాల గురించి అమెరికన్లకు నిజాలు చేరవేయడం ఆస్వాదించాను" అని ఆమె తెలిపారు. కాగా, లెవిట్ ఇటీవలే తన రెండో బిడ్డకు జన్మనిచ్చారు. అధ్యక్షుడు ట్రంప్‌కు ప్రజాదరణ క్రమంగా తగ్గుతుండటం, నవంబర్‌లో జరగనున్న మధ్యంతర ఎన్నికల్లో రిపబ్లికన్ పార్టీకి సవాళ్లు ఎదురవుతాయనే అంచనాలు వెలువడుతున్న తరుణంలో ఈ పరిణామం జరగడం గమనార్హం.