‘కింగ్‌’లో కరీనా కపూర్‌ స్పెషల్‌ అప్పియరెన్స్‌?

షారుఖ్‌ ఖాన్‌ ప్రధాన పాత్రలో రూపొందుతున్న గ్యాంగ్‌స్టర్‌ యాక్షన్‌ డ్రామా ‘కింగ్‌’పై భారీ అంచనాలు నెలకొన్నాయి. ‘వార్‌’, ‘పఠాన్‌’ వంటి చిత్రాలకు దర్శకత్వం వహించిన సిద్ధార్థ్‌ ఆనంద్‌ ఈ సినిమాను తెరకెక్కిస్తున్నారు. ఈ చిత్రంతో షారుఖ్‌ ఖాన్‌ కుమార్తె సుహానా ఖాన్‌ వెండితెరకు పరిచయం కానుంది. స్టార్‌ కాస్ట్‌తో ఇప్పటికే ఈ సినిమాపై ఆసక్తి పెరిగింది.

పింక్‌విల్లా ప్రత్యేక కథనం ప్రకారం కరీనా కపూర్‌ ఈ చిత్రంలో ప్రత్యేక పాత్రలో కనిపించనున్నట్లు సమాచారం. దక్షిణాఫ్రికాలో ఈ నెలాఖరులో చిత్రీకరించనున్న ప్రత్యేక పాటలో ఆమె పాల్గొననున్నట్లు తెలుస్తోంది. భారీ స్థాయిలో తెరకెక్కించనున్న ఈ పాట సినిమాకు ప్రధాన ఆకర్షణల్లో ఒకటిగా నిలవనున్నట్లు సమాచారం. షారుఖ్‌ ఖాన్‌ పుట్టినరోజైన నవంబర్‌ 2న ‘కింగ్‌’ నుంచి కొత్త ప్రమోషనల్‌ కంటెంట్‌ను విడుదల చేసే అవకాశం ఉందని కథనం పేర్కొంది. రెడ్‌ చిల్లీస్‌ ఎంటర్‌టైన్‌మెంట్‌ నిర్మిస్తున్న ఈ చిత్రంలో దీపికా పదుకొణె, అభిషేక్‌ బచ్చన్‌, రాణి ముఖర్జీ, అనిల్‌ కపూర్‌, జాకీ ష్రాఫ్‌, జైదీప్‌ అహ్లావత్‌, అర్షద్‌ వార్సీ, రాఘవ్‌ జుయల్‌ కీలక పాత్రల్లో నటిస్తున్నారు. ఈ సినిమా డిసెంబర్‌ 24న విడుదల కానుంది.