రాషా తడాని ‘లైకీ లైకా’ వాయిదా?

బాలీవుడ్‌లో ‘ఆజాద్‌’ సినిమాతో పరిచయమైన యువ నటి రాషా తడాని, తెలుగులో ‘శ్రీనివాస మంగాపురం’ చిత్రంలోనూ నటించారు. ఆ సినిమా ఆశించిన స్థాయిలో విజయం సాధించకపోయినా రాషా క్రేజ్‌ మాత్రం కొనసాగుతోంది. ప్రస్తుతం ఆమె అభయ్‌ వర్మకు జోడీగా ‘లైకీ లైకా’ అనే రొమాంటిక్‌ యాక్షన్‌ డ్రామాలో నటిస్తున్నారు. ప్రేమ, బాధ, నమ్మకం అనే అంశాల చుట్టూ సాగే ఈ చిత్రానికి సౌరభ్‌ గుప్తా దర్శకత్వం వహిస్తున్నారు. ఈ సినిమాను ఈ ఏడాది వేసవిలో విడుదల చేయాలని మేకర్స్‌ భావించినప్పటికీ, రీషూట్స్‌తో పాటు కొన్ని అదనపు పనుల కారణంగా 2027 ఫిబ్రవరికి వాయిదా వేస్తున్నట్లు సమాచారం.

రాషా తొలి చిత్రం ‘ఆజాద్‌’లోని ‘ఉయి అమ్మ’ పాటతో ఆమె డ్యాన్స్‌కు మంచి ఆదరణ లభించింది. ‘లైకీ లైకా’లోనూ రాషా డ్యాన్సర్‌ పాత్రలో కనిపించనుండటంతో, ఆమె ఇమేజ్‌కు తగ్గట్టుగా ఓ ప్రత్యేక డ్యాన్స్‌ నంబర్‌ను చిత్రంలో చేర్చాలని చిత్రబృందం నిర్ణయించినట్లు తెలుస్తోంది. ఈ కొత్త పాట చిత్రీకరణ కోసమే సినిమా విడుదలను వాయిదా వేసినట్లు సమాచారం. ప్రస్తుతం వినిపిస్తున్న సమాచారం ప్రకారం, ప్రేమకథగా తెరకెక్కుతున్న ఈ చిత్రాన్ని 2027 ఫిబ్రవరిలో వాలెంటైన్స్‌ డే సందర్భంగా థియేటర్లలోకి తీసుకురావాలని మేకర్స్‌ భావిస్తున్నారు.