రకుల్ కొత్త అవతార్‌పై ఆసక్తికర ట్విస్ట్!

నితేశ్ తివారీ దర్శకత్వంలో తెరకెక్కుతున్న ‘రామాయణ: పార్ట్ 1’లో రావణుడి సోదరి శూర్పణఖ పాత్రలో నటిస్తున్న కథానాయిక రకుల్ ప్రీత్ సింగ్ తన పాత్రపై ఆసక్తికర విషయాలను పంచుకుంది. ఈ సినిమా స్క్రిప్ట్ తనకు శూర్పణఖ జీవితంలోని ఇప్పటివరకు పెద్దగా తెలియని అనేక కోణాలను అర్థం చేసుకునేందుకు సహాయపడిందని తెలిపింది. ముఖ్యంగా లక్ష్మణుడు ఆమె ముక్కును కోసిన ఘటనకు ముందు, ఆ తర్వాత ఆమె జీవితంలో చోటుచేసుకున్న అంశాలను తెలుసుకోవడం తనకు ఎంతో ఆసక్తికరంగా అనిపించిందని పేర్కొంది.

శూర్పణఖను చరిత్రలో తరచుగా భయంకరమైన ప్రతినాయకురాలిగా మాత్రమే చిత్రీకరించినప్పటికీ, ఆమె వ్యక్తిత్వంలో అనేక విభిన్న కోణాలు ఉన్నాయని రకుల్ తెలిపింది. లంకలో ఆమెను అత్యంత అందమైన మహిళగా భావించేవారని, ఆమెకు బలమైన అహం కూడా ఉండేదని చెప్పింది. శూర్పణఖ వ్యక్తిత్వంలోని సహజసిద్ధమైన సంక్లిష్టత, భావోద్వేగాలతో కూడిన వివిధ కోణాలే తనను ఈ పాత్ర వైపు ఆకర్షించాయని రకుల్ ప్రీత్ సింగ్ వెల్లడించింది.