

గత రెండేళ్లుగా కొత్తదనం ఉన్న సినిమాలకు ప్రేక్షకుల నుంచి మంచి ఆదరణ లభిస్తోందని, యువ రచయితలు, దర్శకులు తమ ప్రతిభతో చిత్ర పరిశ్రమకు కొత్త ఉత్సాహాన్ని తీసుకొస్తున్నారని మెగాస్టార్ చిరంజీవి అన్నారు. అనుభవజ్ఞులైన అగ్ర దర్శకులు పరిశ్రమకు గౌరవం తీసుకొచ్చినప్పటికీ, ప్రేక్షకులను మళ్లీ థియేటర్లకు రప్పిస్తున్నది యువ దర్శకులేనని అభిప్రాయపడ్డారు. మంగళవారం రాత్రి హైదరాబాద్లో జరిగిన ‘ఇట్లు అర్జున’ సినిమా విజయోత్సవ కార్యక్రమానికి ఆయన ముఖ్య అతిథిగా హాజరయ్యారు. ఈ చిత్రంతో అనీష్ కథానాయకుడిగా పరిచయం కాగా, అనస్వర రాజన్ కథానాయికగా నటించారు. మహేశ్ ఉప్పల దర్శకత్వం వహించిన ఈ సినిమాకు వెంకీ కుడుముల నిర్మాతగా వ్యవహరించగా, అక్కినేని నాగార్జున సమర్పకుడిగా వ్యవహరించారు. ఈ సందర్భంగా చిరంజీవి మాట్లాడుతూ.. తొలి సినిమాతోనే విభిన్నమైన పాత్రలో నటించే అవకాశం రావడం అనీష్ అదృష్టమని ప్రశంసించారు. ‘ఇట్లు అర్జున’ వెనుక పనిచేసిన యువ బృందాన్ని అభినందించారు. గతంలో చిన్న సినిమాలకు థియేటర్లలో ఆదరణ తగ్గినప్పటికీ, ప్రస్తుతం యువతరం ప్రతిభతో థియేటర్లు మళ్లీ కళకళలాడుతున్నాయని పేర్కొన్నారు.
ఈ సందర్భంగా నాగార్జున మాట్లాడుతూ.. తాను సమర్పించిన ‘ఇట్లు అర్జున’ సినిమా విజయం సాధించడం ఎంతో సంతోషంగా ఉందన్నారు. చిరంజీవి ఈ కార్యక్రమానికి హాజరై అనీష్ను ఆశీర్వదించడం ఆనందంగా ఉందని తెలిపారు. రామ్చరణ్ తనను అన్న అని పిలుస్తాడని, తన కుమారుడు అఖిల్ చిరంజీవిని పెదనాన్న అని సంబోధిస్తాడని సరదాగా వ్యాఖ్యానించారు. తాను కూడా చిరంజీవిని అన్న అని పిలుస్తానని నవ్వుతూ చెప్పారు. మరోవైపు, యువ కథానాయకుడు అనీష్కు తొలి చిత్రంతోనే మంచి గుర్తింపు లభించడం విశేషంగా నిలిచింది. ఈ విజయోత్సవ కార్యక్రమంలో చిత్ర దర్శకుడు మహేశ్ ఉప్పల, నిర్మాత వెంకీ కుడుముల, కథానాయిక అనస్వర రాజన్తో పాటు చిత్రబృందం పాల్గొంది.


కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!