ఎపిక్ సీక్వెల్‌పై నాగవంశీ కీలక ప్రకటన.. కథ అక్కడి నుంచే!

ఆనంద్ దేవరకొండ, వైష్ణవి చైతన్య జంటగా నటించిన తాజా చిత్రం ‘ఎపిక్’ నేడు థియేటర్లలో విడుదలై మిశ్రమ స్పందనను అందుకుంది. సినిమా కథాంశంపై వస్తున్న విమర్శలపై నిర్మాత నాగవంశీ స్పందించారు. అన్ని వయసుల ప్రేక్షకులు ఈ కథను పూర్తిగా అర్థం చేసుకోవడం కష్టమని ఆయన పేర్కొన్నారు. అయితే, సినిమాకు సీక్వెల్ ఉంటుందని అధికారికంగా ప్రకటించడంతో ప్రేక్షకుల్లో ఆసక్తి పెరిగింది.

మొదటి భాగంలో ఆదిత్య, కడలి ప్రయాణం, వారి మధ్య ఉన్న భావోద్వేగాలపై ప్రధానంగా దృష్టి పెట్టారు. రెండో భాగంలో వీరి జీవితాలు ఆ తర్వాత ఎలా కొనసాగాయనే అంశాన్ని చూపించనున్నారు. ఆదిత్య, కడలి పెళ్లి చేసుకున్నారా? ఆ తర్వాత వారి జీవితంలో ఎలాంటి సవాళ్లు ఎదురయ్యాయి? అనే విషయాలకు సీక్వెల్‌లో సమాధానం లభించనుంది. ఆదిత్య హాసన్ దర్శకత్వం వహించిన ఈ చిత్రాన్ని సూర్యదేవర నాగవంశీ, సాయి సౌజన్య నిర్మించగా, హేషమ్ అబ్దుల్ వహాబ్ సంగీతం అందించారు.