భక్తిపై కాదు...పౌర స్పృహపైనే ఫిర్యాదు - అల్లు శిరీష్

వినాయక నిమజ్జనాలు ముగిసిన తర్వాత కూడా అర్ధరాత్రి దాటిన తరువాత హనుమాన్ ఆలయంలో డీజే పాటలను అధిక శబ్దంతో ప్లే చేయడంపై మెగా హీరో అల్లు శిరీష్ పోలీసులకు ఫిర్యాదు చేసిన విషయం తెలిసిందే. ఈ విషయాన్ని ఆయన ఎక్స్‌లో పోస్టు చేశారు. అనంతరం మరో ట్వీట్ చేస్తూ, తన ఫిర్యాదు భక్తికి వ్యతిరేకంగా కాదని, సామాజిక, పౌర స్పృహకు సంబంధించినదేనని స్పష్టం చేశారు. అర్ధరాత్రి 2, 3 గంటల వరకు భారీ శబ్దాలతో పాటలు ప్లే చేయడంతో షేక్‌పేట్‌లో నివసిస్తున్న తమతో పాటు చుట్టుపక్కల ప్రాంతాల ప్రజలు కూడా ఇబ్బందులు ఎదుర్కొంటున్నారని తెలిపారు.

తాను హనుమంతుడి భక్తుడినేనని చెప్పిన అల్లు శిరీష్.. అర్ధరాత్రి వరకు భారీ శబ్దాలతో పాటలు పెట్టడం భక్తి కాదని పేర్కొన్నారు. ప్రతి ఒక్కరూ పౌర స్పృహను పాటించాల్సిన అవసరం ఉందని అన్నారు. ప్రాథమిక పౌర బాధ్యతలను అందరూ పాటిస్తే ఇలాంటి ఫిర్యాదులు చేయాల్సిన పరిస్థితి ఉండదని తన ట్వీట్‌లో స్పష్టం చేశారు. ఆయన చేసిన వ్యాఖ్యలు ప్రస్తుతం సామాజిక మాధ్యమాల్లో చర్చనీయాంశంగా మారాయి.