శ్రద్ధా కపూర్ ‘ఈత’ ట్రైలర్ విడుదల తేదీ ఖరారు

బాలీవుడ్ స్టార్ శ్రద్ధా కపూర్ ప్రధాన పాత్రలో నటిస్తున్న తాజా మ్యూజికల్ డ్రామా ‘ఈత’ ప్రేక్షకుల్లో ఆసక్తిని పెంచుతోంది. మ్యాడాక్ ఫిల్మ్స్, కథ్‌పుత్లీ క్రియేషన్స్ సంయుక్తంగా నిర్మిస్తున్న ఈ చిత్రానికి విజయవంతమైన దర్శకుడు లక్ష్మణ్ ఉటేకర్ దర్శకత్వం వహిస్తున్నారు. చావా వంటి బ్లాక్‌బస్టర్ సినిమా తర్వాత ఆయన తెరకెక్కిస్తున్న చిత్రం కావడంతో దీనిపై భారీ అంచనాలు నెలకొన్నాయి. మహారాష్ట్రకు చెందిన ప్రముఖ తమాషా జానపద కళాకారిణి విఠాబాయి నారాయణ్‌గావ్‌కర్ జీవితం ఆధారంగా ఈ సినిమాను రూపొందిస్తున్నారు. ఇందులో శ్రద్ధా కపూర్ మునుపెన్నడూ చూడని విభిన్నమైన, శక్తివంతమైన పాత్రలో కనిపించనున్నారు.

సమాజంలోని అనేక అడ్డంకులు, సవాళ్లను ఎదుర్కొంటూ జానపద కళారంగంలో ప్రత్యేక గుర్తింపు తెచ్చుకున్న విఠాబాయి ప్రయాణాన్ని ఈ చిత్రంలో ఆవిష్కరించనున్నారు. మహారాష్ట్ర సంస్కృతి, తమాషా జానపద కళల నేపథ్యంలో సాగే ఈ సినిమాలో శ్రద్ధా కపూర్ నటనతో పాటు ఆమె నృత్య ప్రదర్శనలు ప్రధాన ఆకర్షణగా నిలవనున్నాయి. ఈ చిత్రాన్ని 2026 డిసెంబర్ 4న ప్రపంచవ్యాప్తంగా థియేటర్లలో విడుదల చేసేందుకు మేకర్స్ సిద్ధమవుతున్నారు. ఈ నేపథ్యంలో, సినిమా ట్రైలర్ అక్టోబర్ 30న విడుదల కానున్నట్లు శ్రద్ధా కపూర్ తాజాగా ప్రకటించారు. ప్రేక్షకుల కోసం అద్భుతమైన ప్రదర్శన సిద్ధంగా ఉందంటూ ఆమె సినిమా ప్రచారంపై ఆసక్తిని పెంచారు.