స్థానిక సంస్థల ఎన్నికల్లో ఎన్డీఏ అభ్యర్థులకు మద్దతివ్వాలని ప్రజలకు చంద్రబాబు, పవన్‌ కల్యాణ్‌ విజ్ఞప్తి

అమరావతిలో నిర్వహించిన మీడియా సమావేశంలో ఎన్డీఏ నేతలు స్థానిక సంస్థల ఎన్నికల్లో కూటమి అభ్యర్థులను గెలిపించాలని ప్రజలకు విజ్ఞప్తి చేశారు. ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్‌ కల్యాణ్‌, ఏపీ బీజేపీ అధ్యక్షుడు పీవీఎన్‌ మాధవ్‌ కూటమి తరఫున మాట్లాడారు. రాష్ట్రంలో కూటమి ప్రభుత్వం సంక్షేమం, అభివృద్ధి, సుపరిపాలనకు ప్రాధాన్యం ఇస్తోందని పీవీఎన్‌ మాధవ్‌ పేర్కొన్నారు. ఎన్నికల సమయంలో ఇచ్చిన హామీలను అమలు చేశామని, ఇంకా అమలు చేస్తూనే ఉన్నామని తెలిపారు. ప్రధాని మోదీ నేతృత్వంలోని కేంద్ర ప్రభుత్వం రాష్ట్రానికి సహకరిస్తోందని చెప్పారు.

స్థానిక ఎన్నికల్లో టీడీపీ, జనసేన, బీజేపీ ఐక్యంగా ముందుకు సాగుతున్నాయని పవన్‌ కల్యాణ్‌ తెలిపారు. మూడు పార్టీల మధ్య సీట్ల సర్దుబాటుపై ఏకాభిప్రాయం కుదిరిందని, క్షేత్రస్థాయిలోనూ అదే స్ఫూర్తితో పనిచేయాలని కోరారు. సార్వత్రిక ఎన్నికలతో పోలిస్తే స్థానిక ఎన్నికల్లో సీట్ల సర్దుబాటు క్లిష్టంగా ఉంటుందని, రాష్ట్ర ప్రయోజనాలను దృష్టిలో ఉంచుకుని నిర్ణయాలు తీసుకున్నామని వివరించారు. సీట్లు దక్కని వారికి న్యాయం చేసే బాధ్యత తీసుకుంటామని హామీ ఇచ్చారు. కూటమి ప్రకటించిన అభ్యర్థులకు మద్దతు ఇచ్చి గెలిపించాలని ప్రజలకు, పార్టీ శ్రేణులకు పిలుపునిచ్చారు.