‘రామాయణ’లో సీతను యోధురాలిగా చూపించడానికి కారణమిదే - నితేష్ తివారీ

నితేష్ తివారీ దర్శకత్వంలో తెరకెక్కిన భారీ చిత్రం రామాయణలో సీత పాత్రను సాయిపల్లవి పోషిస్తున్నారు. ఈ సినిమాలో సీతను యోధురాలిగా చూపించడంతో పాటు, ఆమె పోరాట సన్నివేశాల్లో పాల్గొనడంపై కొందరు అభ్యంతరాలు వ్యక్తం చేశారు. ఈ విమర్శలపై తాజాగా స్పందించిన దర్శకుడు నితేష్ తివారీ, సీత పాత్రను అలా చూపించడం వెనుక సంప్రదాయ రామాయణ కథనాల స్ఫూర్తి ఉందని వివరించారు. సంస్కృతంలోని అద్భుత రామాయణం, 15వ శతాబ్దానికి చెందిన ఒడియా బిలంక రామాయణంలో సీత పాత్ర విభిన్నంగా ఉంటుందని ఆయన పేర్కొన్నారు. ఈ కథనాల్లో సీత కేవలం సహనం, త్యాగానికి ప్రతిరూపంగా మాత్రమే కాకుండా, శక్తిమంతమైన యోధురాలిగా, దైవశక్తి స్వరూపిణిగా కనిపిస్తారని తెలిపారు. కొన్ని కథనాల ప్రకారం, శ్రీరాముడికి క్లిష్ట పరిస్థితి ఎదురైనప్పుడు సీత మహాకాళి రూపాన్ని ధరించి సహస్ర రావణుడిని సంహరిస్తారని వివరించారు. ప్రాంతీయ రామాయణాల్లో ఇప్పటికే ఉన్న ఈ కథనాల స్ఫూర్తితోనే తమ సినిమాలో సీత పాత్రను అలా తీర్చిదిద్దినట్లు నితేష్ స్పష్టం చేశారు.

ఈ సినిమాలో కైకేయి పాత్ర పోషిస్తున్న నటి లారా దత్తా కూడా గతంలో ఈ అంశంపై స్పందించారు. సినిమాను ఆస్వాదించాలని కోరిన ఆమె అప్పట్లో రాజకుటుంబాల్లోని యువరాజులు, యువరాణులకు వివిధ కళలతో పాటు యుద్ధ విద్యల్లోనూ శిక్షణ ఇచ్చేవారని గుర్తుచేశారు. అలాంటప్పుడు సీతకు యుద్ధ విద్య తెలిసి ఉండటంలో ఆశ్చర్యం లేదని అభిప్రాయపడ్డారు. సీత పాత్ర చిత్రణపై జరుగుతున్న చర్చతో రామాయణంలోని విభిన్న ప్రాంతీయ కథనాలు మరోసారి తెరపైకి వచ్చాయి. ఈ చిత్ర తొలి భాగం నవంబర్ 5న థియేటర్లలో విడుదల కాగా, రెండో భాగాన్ని 2028లో ప్రేక్షకుల ముందుకు తీసుకురావడానికి చిత్ర బృందం సిద్ధమవుతోంది.