“ఎన్టీఆర్ ని కించపరచాలనే ఉద్దేశం మాకు లేదు" : దర్శకుడు మేర్లపాక గాంధీ

కొరియన్ కనకరాజు సినిమాలోని ఓ సన్నివేశం విషయంలో వస్తున్న వివాదంపై దర్శకుడు మేర్లపాక గాంధీ స్పందించారు. ఈ సన్నివేశం ద్వారా దిగ్గజ నటుడు ఎన్టీఆర్‌ను కించపరచడం లేదా అవమానించడం తమ ఉద్దేశం కాదని ఆయన స్పష్టం చేశారు. కేవలం ఎన్టీఆర్ గారిని ఇమిటేట్ చేశామని, ఆయనలాంటి లెజెండరీ వ్యక్తిని తక్కువ చేసి చూపించాలని తాము ఎప్పుడూ అనుకోమని తెలిపారు.

గతంలో చిరంజీవి గారిని, షారుక్ ఖాన్ గారిని కూడా ఇమిటేట్ చేశామని మేర్లపాక గాంధీ గుర్తుచేశారు. సినిమా వినోదంలో భాగంగానే ఇలాంటి రిఫరెన్స్‌లు ఉంటాయని, అయితే సోషల్ మీడియాలో కొందరు ఈ విషయాన్ని కావాలనే ఎక్కువగా చేస్తున్నారని అన్నారు. తమ ఉద్దేశం ఎవరినీ బాధపెట్టడం కాదని ఆయన స్పష్టం చేశారు.

వరుణ్ తేజ్ హీరోగా నటిస్తున్న కోరియన్ కనకరాజులో రితికా నాయక్, సత్య కీలక పాత్రల్లో కనిపిస్తున్నారు. మేర్లపాక గాంధీ దర్శకత్వం వహిస్తున్న ఈ చిత్రానికి థమన్ ఎస్ సంగీతం అందించగా, మనోజ్ రెడ్డి సినిమాటోగ్రఫీ బాధ్యతలు నిర్వహిస్తున్నారు.