‘మండాడి’ ఓటీటీ రిలీజ్‌ డేట్‌ ఫిక్స్‌?

తమిళ నటుడు సూరి, తెలుగు నటుడు సుహాస్‌ కలిసి నటించిన ‘మండాడి’ స్పోర్ట్స్‌ యాక్షన్‌ డ్రామాగా ప్రేక్షకుల ముందుకు వచ్చి మంచి స్పందనను సొంతం చేసుకుంది. సముద్రం నేపథ్యంలో సాగే పడవ పందాలు, యాక్షన్‌, ఆధిపత్య పోరు వంటి అంశాలతో తెరకెక్కిన ఈ సినిమాలో సుహాస్‌ తొలిసారిగా తమిళ చిత్రంలో నటించాడు. నెగెటివ్‌ షేడ్స్‌ ఉన్న పాత్రలో సుహాస్‌ కనిపించగా.. సత్యరాజ్‌, మహిమా నంబియార్‌ తదితరులు కీలక పాత్రలు పోషించారు. మతిమారన్‌ పుగళేంది దర్శకత్వం వహించిన ఈ సినిమా ప్రపంచవ్యాప్తంగా రూ.140 కోట్లకు పైగా వసూలు చేసినట్లు చిత్ర బృందం పేర్కొన్నట్లు పలు నివేదికలు వెల్లడించాయి.

ఇక ‘మండాడి’ డిజిటల్‌ స్ట్రీమింగ్‌ హక్కులను నెట్‌ఫ్లిక్స్‌ సొంతం చేసుకుంది. ఈ సినిమా అక్టోబర్‌ 9 నుంచి నెట్‌ఫ్లిక్స్‌లో స్ట్రీమింగ్‌ కానున్నట్లు ప్రస్తుతం వార్తలు వినిపిస్తున్నాయి. తెలుగు, తమిళం, హిందీ, కన్నడ, మలయాళ భాషల్లో డిజిటల్‌ ప్రీమియర్‌ ఉండొచ్చని సమాచారం. అయితే అక్టోబర్‌ 9 ఓటీటీ రిలీజ్‌ తేదీపై నెట్‌ఫ్లిక్స్‌ లేదా చిత్ర బృందం నుంచి అధికారిక ప్రకటన రావాల్సి ఉంది. జీవీ ప్రకాష్‌ కుమార్‌ సంగీతం అందించిన ఈ చిత్రాన్ని ఆర్‌ఎస్‌ ఇన్ఫోటైన్‌మెంట్‌ నిర్మించింది.