నందన్ నీలేకనితో సీఎం చంద్రబాబు భేటీ.. జాతీయ పరీక్షల విధానంలో మార్పులపై చర్చ

భారతదేశంలోని అన్ని రాష్ట్రాలు, భాషలకు చెందిన విద్యార్థులకు సమాన అవకాశాలు కల్పించేలా జాతీయ పరీక్షా విధానంలో సమగ్ర సంస్కరణలు తీసుకురావాలని ముఖ్యమంత్రి చంద్రబాబు నాయుడు సూచించారు. నవంబర్ 4న అమరావతిలోని రాష్ట్ర సచివాలయంలో ఎగ్జామినేషన్ రిఫార్మ్స్ హై పవర్డ్ టాస్క్‌ఫోర్స్ ఛైర్మన్ నందన్ నీలేకని, ఇతర సభ్యులతో ఆయన సమావేశమయ్యారు. ఈ సందర్భంగా నందన్ నీలేకనికి మంత్రి నారా లోకేష్ స్వాగతం పలికారు. అన్ని రాష్ట్రాల అభిప్రాయాలను పరిగణనలోకి తీసుకుని ఏకాభిప్రాయంతో పారదర్శకమైన, విశ్వసనీయమైన పరీక్షా విధానాన్ని రూపొందించాలని చంద్రబాబు అన్నారు. విద్యార్థుల నైపుణ్యాలు, సృజనాత్మకత, ఆలోచనా సామర్థ్యాన్ని పెంపొందించేలా విద్యా విధానం ఉండాలని సూచించారు.

ఈ సమావేశంలో మంత్రి నారా లోకేష్ మాట్లాడుతూ విద్యార్థులపై పరీక్షల ఒత్తిడిని తగ్గించేలా సంస్కరణలు చేపట్టాలని కోరారు. ఒక రాష్ట్రం నుంచి మరో రాష్ట్రానికి వెళ్లి చదువుకోవడం లేదా ఉద్యోగం చేయడంలో భాష, విద్యా విధానం, ధృవీకరణ పత్రాల పరంగా ఇబ్బందులు లేకుండా జాతీయ స్థాయిలో సమన్వయం అవసరమని పేర్కొన్నారు. రాష్ట్రంలో డేటా లేక్ ద్వారా వివిధ రంగాల సమాచారాన్ని సమీకరించి నిర్ణయాలు తీసుకుంటున్న విధానాన్ని వివరించారు. మరోవైపు, పరీక్షల్లో పేపర్ లీకేజీలను అరికట్టడం, సాంకేతికత వినియోగం, సైబర్ సెక్యూరిటీ, డిజిటల్ ఫోరెన్సిక్స్‌ను బలోపేతం చేయడంపై దృష్టి పెట్టినట్లు నందన్ నీలేకని తెలిపారు. వివిధ రాష్ట్రాల్లో పర్యటించి అక్కడి విధానాలు, సమస్యలు, సంస్కరణలపై అభిప్రాయాలు సేకరిస్తున్నట్లు వెల్లడించారు.