త్వరలో 'భారతీయ వాయుయాన్ నియమ్-2026' ఏళ్ల నాటి చట్టం రద్దు

దేశ పౌర విమానయాన రంగంలో చారిత్రక సంస్కరణలకు కేంద్ర ప్రభుత్వం శ్రీకారం చుట్టింది. దాదాపు 90 ఏళ్లుగా అమల్లో ఉన్న 1937 నాటి ఎయిర్‌క్రాఫ్ట్ రూల్స్ స్థానంలో "భారతీయ వాయుయాన్ నియమ్-2026" పేరుతో సమగ్రమైన కొత్త నిబంధనలను తీసుకువచ్చింది. వేగంగా విస్తరిస్తున్న విమానయాన రంగాన్ని నియంత్రించేందుకు రూపొందించిన ఈ నిబంధనలు 2027 జనవరి 1 నుంచి అమల్లోకి రానున్నాయి. ఈ మేరకు బుధవారం నాడు ప్రభుత్వం అధికారికంగా వివరాలు వెల్లడించింది.

ఈ కొత్త నిబంధనలలో పలు కీలక మార్పులు చేశారు. ముఖ్యంగా, విమానాల డిజైన్, సర్టిఫికేషన్ కోసం స్పష్టమైన వ్యవస్థను ఏర్పాటు చేశారు. దీనివల్ల 'స్టేట్ ఆఫ్ డిజైన్'గా (విమానాలను డిజైన్ చేసే దేశం) భారత్ స్థానం మరింత బలోపేతం కానుంది. అలాగే, విమానాల విడిభాగాల తయారీకి కూడా అధికారం లభిస్తుంది. దీంతో పాటు ఒక విమానాన్ని పలువురు వ్యక్తులు కలిసి కొనుగోలు చేసేందుకు వీలు కల్పించే 'ఫ్రాక్షనల్ ఓనర్‌షిప్' విధానాన్ని కూడా ప్రవేశపెట్టారు. విమానాల లీజింగ్ ప్రక్రియను సులభతరం చేసే ఐడీఈఆర్ఏ (ఇర్రివోకబుల్ డీ-రిజిస్ట్రేషన్ అండ్ ఎక్స్‌పోర్ట్ రిక్వెస్ట్ ఆథరైజేషన్) విధానం ప్రకారం విమానాల కొనుగోలు, లీజింగ్ ఖర్చులు తగ్గి భవిష్యత్తులో విమాన ఛార్జీలు కూడా తగ్గే అవకాశం ఉంది.

కొత్త రూల్స్ ద్వారా విమానయాన సంస్థల వాణిజ్య సౌలభ్యం, ప్రయాణికుల ప్రయోజనాల మధ్య సమతుల్యత సాధించాలని లక్ష్యంగా పెట్టుకున్నారు. విమాన ఛార్జీలు, ఇతర రుసుములలో మరింత పారదర్శకతను తీసుకురానున్నారు. అసాధారణ పరిస్థితులు తలెత్తినప్పుడు కేంద్ర ప్రభుత్వం నేరుగా జోక్యం చేసుకుని తగిన చర్యలు తీసుకునేందుకు ఈ నిబంధనలు అధికారం కల్పిస్తున్నాయి. మొత్తం 8 అధ్యాయాలు, 6 షెడ్యూళ్లలో 220 నిబంధనలతో ఈ చట్టాన్ని రూపొందించారు.

నియంత్రణ సంస్థ అయిన డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ)కు ఈ నిబంధనలు మరిన్ని అధికారాలు కట్టబెట్టాయి. భారత్‌లో డిజైన్ చేసిన విమానాలు, ఇంజిన్లు, ప్రొపెల్లర్లకు డీజీసీఏ టైప్ సర్టిఫికేట్లను జారీ చేయవచ్చు. భద్రతకు ముప్పు వాటిల్లే పరిస్థితులు ఏర్పడినప్పుడు వెంటనే ఆదేశాలు జారీ చేసే అధికారం కూడా డీజీసీఏకు ఉంటుంది.

విమానయాన సిబ్బందికి సంబంధించిన లైసెన్సింగ్ ప్రక్రియలో కూడా కీలక మార్పులు చేశారు. పైలట్లు, ఫ్లైట్ ఇంజనీర్లతో సహా మొత్తం 23 కేటగిరీల లైసెన్సులు, రేటింగ్‌లకు సంబంధించిన అర్హతలు, వైద్య ప్రమాణాలు, శిక్షణ, అనుభవం వంటి అంశాలను ఈ నూతన చట్టంలో స్పష్టంగా నిర్దేశించారు. స్టూడెంట్ పైలట్ నుంచి ఎయిర్‌లైన్ ట్రాన్స్‌పోర్ట్ పైలట్ వరకు అందరికీ ఈ నిబంధనలు వర్తిస్తాయి.