రేషన్ డీలర్ల సమస్యలపై కాంగ్రెస్ ప్రభుత్వాన్ని నిలదీసిన హరీశ్ రావు

సిద్దిపేట జిల్లా గజ్వేల్ ప్రజ్ఞాపూర్‌లోని బింగి ఎల్లయ్య గార్డెన్స్‌లో నిర్వహించిన రాష్ట్రవ్యాప్త రేషన్ డీలర్ల సమావేశానికి మాజీ మంత్రి, బీఆర్ఎస్ఎల్పీ డిప్యూటీ ఫ్లోర్ లీడర్ హరీశ్ రావు ముఖ్య అతిథిగా హాజరయ్యారు. రాష్ట్రంలోని 33 జిల్లాల నుంచి వచ్చిన రేషన్ డీలర్ల సమస్యలపై సమావేశంలో చర్చించారు. ఈ సందర్భంగా కాంగ్రెస్ ప్రభుత్వంపై హరీశ్ రావు తీవ్ర విమర్శలు చేశారు. సివిల్ సప్లైస్ కార్పొరేషన్‌ను రూ. లక్ష కోట్ల అప్పుల్లోకి నెట్టారని, రూ. 600 కోట్ల విలువైన దొడ్డు బియ్యం 16 నెలలుగా గోదాములు, షాపుల్లో నిల్వ ఉండటంతో వృథా అవుతోందని ఆరోపించారు.

రాష్ట్రంలో 17,200 మంది రేషన్ డీలర్లకు నెలకు రూ. 10 కోట్ల గౌరవ వేతనం చెల్లించేందుకు ప్రభుత్వం వద్ద నిధులు లేవా అని హరీశ్ రావు ప్రశ్నించారు. ఎన్నికల సమయంలో నెలకు రూ. 5,000 గౌరవ వేతనం, రూ. 300 కమిషన్, మినీ సూపర్ మార్కెట్లు ఏర్పాటు చేస్తామని హామీ ఇచ్చి అమలు చేయలేదని విమర్శించారు. బిల్లుల కోసం కాంగ్రెస్ ఎమ్మెల్యే అనిరుధ్ రెడ్డి, సమస్యల పరిష్కారం కోసం రేషన్ డీలర్ల సంఘం అధ్యక్షుడు రాజు ప్రాణత్యాగం గురించి మాట్లాడాల్సిన పరిస్థితి ఏర్పడిందని వ్యాఖ్యానించారు. డీలర్ల సంఘాన్ని వెంటనే చర్చలకు పిలిచి హామీలు నెరవేర్చకపోతే అసెంబ్లీ, కౌన్సిల్‌లో ప్రభుత్వాన్ని నిలదీస్తామని హెచ్చరించారు.