నేరెళ్ల బాధితులకు న్యాయం చేయాలి.. కాంగ్రెస్, బీఆర్ఎస్‌పై కవిత విమర్శలు

నేరెళ్ల బాధితులను కాంగ్రెస్, బీఆర్ఎస్ పార్టీలు దగా చేస్తున్నాయని తెలంగాణ రక్షణ సేన చీఫ్ కల్వకుంట్ల కవిత ఆరోపించారు. 2017లో నేరెళ్లలో జరిగిన ఘటనలో బాధితులుగా ఉన్న కుటుంబాలకు ఇప్పటికీ పూర్తిస్థాయిలో న్యాయం జరగలేదని అన్నారు. సిరిసిల్ల పర్యటన సందర్భంగా కొందరు బాధితులకు రూ.5 లక్షలు, మరికొందరికి రూ.10 లక్షల పరిహారం అందించారని, అయితే ఆ మొత్తంతో వారి జీవితాలు స్థిరపడతాయా అని ప్రశ్నించారు. ప్రతి బాధిత కుటుంబానికి రూ.కోటి పరిహారం, మూడు ఎకరాల భూమి, కుటుంబంలో ఒకరికి ప్రభుత్వ ఉద్యోగం ఇవ్వాలని డిమాండ్ చేశారు. నేరెళ్ల ఘటనపై గతంలో ముఖ్యమంత్రి రేవంత్ రెడ్డి చేసిన హామీలను ప్రభుత్వం నిలబెట్టుకోవాలని కోరారు.

నేరెళ్ల ఘటనకు సంబంధించిన కీలక నివేదికలు అందుబాటులో లేవని బాధితులు ఆవేదన వ్యక్తం చేస్తున్నారని కవిత తెలిపారు. జైలు, ఆసుపత్రి నివేదికలు, అప్పటి అధికారుల విచారణ నివేదికలు, జాతీయ ఎస్సీ కమిషన్ ప్రజా విచారణకు సంబంధించిన వివరాలపై ప్రభుత్వం స్పష్టత ఇవ్వాలని డిమాండ్ చేశారు. బాధితులపై నమోదైన కేసులను వెంటనే ఉపసంహరించుకోవాలని, పెండింగ్‌లో ఉన్న న్యాయపరమైన అంశాలను పరిష్కరించాలని కోరారు. కాంగ్రెస్, బీఆర్ఎస్ ప్రభుత్వాల హయాంలోనూ నేరెళ్ల బాధితులకు అన్యాయం జరిగిందని ఆరోపించిన కవిత.. ఈ అంశంపై ప్రభుత్వానికి లేఖ రాసి న్యాయం కోసం పోరాడుతామని తెలిపారు.