ఆర్టీసీ రిటైర్డ్ ఉద్యోగుల బకాయిలు చెల్లిస్తాం.. అవసరమైతే భూముల విక్రయం: మంత్రి పొన్నం ప్రభాకర్

తెలంగాణ రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్‌ను ఇటీవల ఆర్టీసీ కార్మిక సంఘాల గుర్తింపు ఎన్నికల్లో విజయం సాధించిన ఐక్య కూటమి నాయకులు మర్యాదపూర్వకంగా కలిశారు. ఈయూ (EU), టీఎంయూ (TMU), ఎన్ఎంయూ (NMU) ప్రతినిధులు మినిస్టర్ క్వార్టర్స్‌లో మంత్రిని కలవగా, ఆయన వారిని అభినందించి సత్కరించారు. ప్రజాస్వామ్యంలో ప్రతి స్థాయిలో ఎన్నికలు ముఖ్యమని, కార్మిక సంఘాల ఎన్నికల మాదిరిగానే విద్యార్థి సంఘాల ఎన్నికలు కూడా కీలకమని పేర్కొన్నారు. విద్యార్థుల సమస్యల పరిష్కారానికి, వారి హక్కుల పరిరక్షణకు ప్రజాస్వామ్యబద్ధమైన నాయకత్వం అవసరమని చెప్పారు. తాను కూడా విద్యార్థి సంఘాల ఎన్నికల ద్వారానే రాజకీయాల్లోకి వచ్చానని గుర్తుచేశారు.

కార్మికుల సమస్యలను తొందరపాటు నిర్ణయాలతో కాకుండా నిర్మాణాత్మక చర్చల ద్వారా పరిష్కరించేందుకు ప్రభుత్వం కట్టుబడి ఉందని మంత్రి తెలిపారు. ఆర్టీసీ విలీన ప్రక్రియకు సంబంధించిన అంశాలపై అధికారులు, కార్మిక సంఘాల నాయకులు సమన్వయంతో పనిచేయాలని, భవిష్యత్తులో సమస్యలు తలెత్తకుండా ముందస్తు చర్యలు తీసుకోవాలని సూచించారు. రిటైర్డ్ ఉద్యోగుల బకాయిలతో పాటు సీసీఎస్ బకాయిలు, ఇతర పెండింగ్ సమస్యలను పరిష్కరించేందుకు చర్యలు తీసుకుంటామని హామీ ఇచ్చారు. అవసరమైతే ఆర్టీసీకి చెందిన విలువైన భూములను విక్రయించైనా బకాయిలు చెల్లించేందుకు చర్యలు తీసుకుంటామని, ఈ విషయాన్ని ముఖ్యమంత్రి రేవంత్ రెడ్డి దృష్టికి తీసుకెళ్లినట్లు తెలిపారు. కార్మికుల సంక్షేమం, ప్రయాణికులకు మెరుగైన సౌకర్యాలు, టీజీఎస్‌ఆర్టీసీ అభివృద్ధి ప్రభుత్వ ప్రధాన లక్ష్యాలని పేర్కొంటూ, సంస్థను బలోపేతం చేసేందుకు కార్మికులు, అధికారులు, సంఘాల నాయకులు కలిసికట్టుగా పనిచేయాలని పిలుపునిచ్చారు.