టీమ్‌ఇండియా కెప్టెన్సీపై తిలక్ వర్మ ఆసక్తికర వ్యాఖ్యలు

న్యూజిలాండ్‌తో టీ20 సిరీస్‌ను టీమ్‌ఇండియా మరో రెండు మ్యాచ్‌లు మిగిలి ఉండగానే కైవసం చేసుకుంది. శుక్రవారం నాలుగో టీ20 జరగనుండగా, రాబోయే వన్డే సిరీస్‌ను దృష్టిలో ఉంచుకుని కెప్టెన్ శ్రేయస్ అయ్యర్‌కు విశ్రాంతి ఇచ్చే అవకాశం ఉందని సమాచారం. అదే జరిగితే, టీ20 జట్టు వైస్ కెప్టెన్ తిలక్ వర్మ మిగిలిన రెండు మ్యాచ్‌లకు సారథ్యం వహించే అవకాశముంది. మ్యాచ్‌కు ముందు మీడియాతో మాట్లాడిన తిలక్.. ఒత్తిడిని అధిగమించేందుకు మ్యాచ్‌ను చిన్న చిన్న దశలుగా విభజించి ఆడతానని చెప్పాడు. ఏ బౌలర్‌ను లక్ష్యంగా చేసుకోవాలి, ఎప్పుడు దూకుడుగా ఆడాలి, భాగస్వామితో ఎలా సమన్వయం చేసుకోవాలనే అంశాలపై స్పష్టమైన ప్రణాళికతో ముందుకెళ్తానని వివరించాడు.

తన బ్యాటింగ్ స్థానం ఆధారంగా ఆటతీరును మార్చుకుంటానని తిలక్ తెలిపాడు. మూడో స్థానంలో బ్యాటింగ్‌కు దిగితే పరిస్థితులకు అనుగుణంగా దూకుడు పెంచుతానని, ఐదో లేదా ఆరో స్థానంలో వస్తే ఇన్నింగ్స్‌ను చివరి వరకు తీసుకెళ్లడంపై దృష్టి పెడతానని పేర్కొన్నాడు. అవసరమైతే బౌలింగ్ చేసేందుకు కూడా సిద్ధంగా ఉన్నానని చెప్పాడు. నాయకత్వంలో తనకు దేశవాళీ క్రికెట్‌తో పాటు ఇండియా ఎ, ఎమర్జింగ్ జట్లకు కెప్టెన్‌గా వ్యవహరించిన అనుభవం ఉందని తెలిపాడు. శ్రేయస్ అయ్యర్‌తో తన అనుభవాలను పంచుకుంటూ, అవసరమైనప్పుడు సలహాలు అందిస్తానని, మైదానంలో జట్టుకు తన వంతు సహకారం అందిస్తానని తిలక్ స్పష్టం చేశాడు.