ఢిల్లీ క్యాపిటల్స్‌ కోచింగ్‌ టీమ్‌లోకి యువరాజ్‌ సింగ్‌

టీమిండియా మాజీ ఆల్‌రౌండర్‌ యువరాజ్‌ సింగ్‌ ఐపీఎల్‌లో కోచ్‌గా కొత్త బాధ్యతలు చేపట్టేందుకు సిద్ధమయ్యాడు. ఢిల్లీ క్యాపిటల్స్‌ జట్టుకు బ్యాటింగ్‌ కోచ్‌గా, అసిస్టెంట్‌ కోచ్‌గా వ్యవహరించనున్నట్లు వచ్చిన సమాచారం క్రికెట్‌ వర్గాల్లో ఆసక్తి రేకెత్తిస్తోంది. ఇటీవల సౌరవ్‌ గంగూలీని హెడ్‌ కోచ్‌గా ఎంపిక చేసిన ఢిల్లీ జట్టు, యువరాజ్‌ను కూడా తన కోచింగ్‌ బృందంలోకి తీసుకున్నట్లు కథనం పేర్కొంది. ఈ సందర్భంగా గంగూలీతో తనకున్న అనుబంధాన్ని గుర్తుచేసుకున్న యువరాజ్‌.. “గత 25 ఏళ్లుగా నేను నీకు అసిస్టెంట్‌గానే ఉన్నాను కదా” అంటూ దాదాతో జరిగిన సరదా సంభాషణను పంచుకున్నాడు. తన క్రికెట్‌ ప్రయాణంలో గంగూలీ కీలక పాత్ర పోషించాడని, జట్టుపై నమ్మకం పెంచి విదేశాల్లోనూ విజయాలు సాధించగలమనే ధైర్యాన్ని ఇచ్చాడని తెలిపాడు.

2000లో భారత జట్టులోకి అరంగేట్రం చేసిన యువరాజ్‌ సింగ్‌ 2019లో అంతర్జాతీయ క్రికెట్‌కు వీడ్కోలు పలికాడు. ఐపీఎల్‌లో 132 మ్యాచ్‌లు ఆడి 2,750 పరుగులు సాధించాడు. 2015లో ఢిల్లీ జట్టుకు ప్రాతినిధ్యం వహించిన అతడిని అప్పట్లో రూ.16 కోట్లకు కొనుగోలు చేశారు. అధికారిక కోచింగ్‌ బాధ్యతలు చేపట్టకముందే అభిషేక్‌ శర్మ, శుభ్‌మన్‌ గిల్‌, ప్రభ్‌సిమ్రన్‌ సింగ్‌, రిషభ్‌ పంత్‌ వంటి ఆటగాళ్లకు యువరాజ్‌ మార్గనిర్దేశం చేశాడు. ఢిల్లీ క్యాపిటల్స్‌ నిర్వహణ బాధ్యతలు 2027, 2028 సీజన్లలో జేఎస్‌డబ్ల్యూ గ్రూప్‌ చేతుల్లో ఉండనున్న నేపథ్యంలో, పార్థ్‌ జిందాల్‌ నేతృత్వంలో జట్టు నిర్మాణంలో మార్పులు చోటుచేసుకుంటున్నట్లు కథనం వెల్లడించింది.