క్లాడ్ కోడ్‌కు గుడ్‌బై చెప్పనున్న అలీబాబా..

చైనా టెక్ దిగ్గజం అలీబాబా జూలై 10 నుంచి తమ ఉద్యోగులు ఆంత్రోపిక్ రూపొందించిన క్లాడ్ కోడ్ AI ప్రోగ్రామింగ్ టూల్‌ను ఉపయోగించకుండా నిషేధించనున్నట్లు వార్తలు వెల్లడిస్తున్నాయి. ఈ టూల్‌ను హై-రిస్క్ సాఫ్ట్‌వేర్‌గా వర్గీకరించిన సంస్థ, ఉద్యోగులు ఇకపై తమ సొంత AI కోడింగ్ అసిస్టెంట్ Qoderనే ఉపయోగించాలని ఆదేశించినట్లు సమాచారం. సంస్థ అంతర్గత AI సామర్థ్యాలను మరింత బలోపేతం చేయడంలో భాగంగానే ఈ నిర్ణయం తీసుకున్నట్లు తెలుస్తోంది.

ఇక మరోవైపు, ఆంత్రోపిక్ ఇప్పటికే చైనా కంపెనీలు మరియు వాటికి అనుబంధ సంస్థలు తమ AI మోడళ్లను వినియోగించకుండా పరిమితులు విధించింది. అనధికార వినియోగాన్ని అడ్డుకునేందుకు అదనపు భద్రతా చర్యలను పరీక్షించినప్పటికీ, తరువాత మరింత మెరుగైన రక్షణ వ్యవస్థలు అమల్లోకి రావడంతో వాటిని ఉపసంహరించుకున్నట్లు సమాచారం. తక్కువ ఖర్చుతో అధిక సామర్థ్యం గల AI మోడళ్లను చైనా కంపెనీలు ప్రవేశపెడుతుండగా, అమెరికా కూడా అధునాతన AI టెక్నాలజీలపై నియంత్రణలను కఠినతరం చేయడంతో రెండు దేశాల మధ్య AI పోటీ మరింత ఉత్కంఠభరితంగా మారుతోంది.