క్లాడ్ ఫేబుల్ 5 గడువు మరోసారి పొడిగించిన ఆంథ్రోపిక్..

ఏఐ సంస్థ ఆంథ్రోపిక్ తన అత్యంత శక్తివంతమైన క్లాడ్ ఫేబుల్ 5 మోడల్‌కు చెల్లింపు వినియోగదారుల ఉచిత యాక్సెస్‌ను మరోసారి పొడిగించింది. క్లాడ్ ప్రో, మ్యాక్స్, టీమ్ మరియు అర్హత కలిగిన ఎంటర్‌ప్రైజ్ సబ్‌స్క్రైబర్లకు జూలై 19, 2026 వరకు అదనపు వినియోగ ఛార్జీలు లేకుండా ఈ మోడల్‌ను ఉపయోగించే అవకాశం కల్పించింది. మొదట జూలై 7తో ముగియాల్సిన ఈ సదుపాయాన్ని ఇప్పటికే రెండుసార్లు పొడిగించిన అనంతరం ఇది మూడో పొడిగింపు.

ఈ ఆఫర్ కింద వినియోగదారులు తమ వారపు సబ్‌స్క్రిప్షన్ పరిమితిలో 50 శాతం వరకు క్లాడ్ ఫేబుల్ 5ను ఎలాంటి అదనపు చార్జీలు లేకుండా ఉపయోగించుకోవచ్చు. అయితే ఈ మోడల్ ఇతర క్లాడ్ మోడళ్లతో పోలిస్తే టోకెన్లను వేగంగా వినియోగిస్తుందని ఆంథ్రోపిక్ తెలిపింది. ఉచిత పరిమితి పూర్తయిన తర్వాత అదనపు యూజేజ్ క్రెడిట్లు కొనుగోలు చేయవచ్చు లేదా ఇతర క్లాడ్ మోడళ్లకు మారవచ్చు. అవసరమైన కంప్యూటింగ్ సామర్థ్యం అందుబాటులోకి వచ్చిన తర్వాత పూర్తి స్థాయి యాక్సెస్‌ను పునరుద్ధరిస్తామని సంస్థ వెల్లడించింది.