ఏఐ దెబ్బకు యాపిల్‌లో భారీ మార్పులు!

కృత్రిమ మేధ రంగంలో పెరుగుతున్న పోటీ, మార్కెట్ పరిస్థితుల నేపథ్యంలో టెక్ దిగ్గజం యాపిల్ తన వ్యాపార ప్రాధాన్యతలను పునర్వ్యవస్థీకరిస్తోంది. కంపెనీ ఉత్పత్తులు, సేవల నాణ్యతను మెరుగుపరిచే రీస్ట్రక్చరింగ్‌లో భాగంగా సిరి, విజన్ ప్రో ఇమ్మర్సివ్ వీడియో, గేమింగ్ విభాగాల్లో సుమారు 200 ఉద్యోగాలను తొలగించాలని నిర్ణయించింది. ఇందులో విజన్ ప్రో టీమ్‌కు చెందిన దాదాపు 100 మంది, సిరి, సాఫ్ట్‌వేర్ విభాగాల్లోని మరో 100 మంది ఉద్యోగులు ఉన్నారు. మారిన వ్యూహాలకు అనుగుణంగా కొన్ని పాత హోదాలను తొలగించి, కొత్త విభాగాల్లో అవకాశాలు కల్పిస్తున్నామని యాపిల్ తెలిపింది. ఉద్యోగాలు కోల్పోయిన వారికి అవసరమైన సహాయాన్ని అందిస్తామని పేర్కొంది.

అంచనాలకు తగ్గ వినియోగదారుల ఆదరణ లభించకపోవడం వల్ల 3,699 డాలర్ల విజన్ ప్రో హెడ్‌సెట్‌ విభాగంలో మార్పులు చేపట్టినట్లు తెలుస్తోంది. ఖరీదైన 3డీ ఇమ్మర్సివ్ వీడియో కంటెంట్‌ తయారీని తగ్గించడంతో పాటు, విజన్ ప్రో గేమింగ్‌ కార్యకలాపాలను దాదాపు నిలిపివేసి థర్డ్‌పార్టీ డెవలపర్లకు ప్రోత్సాహం ఇవ్వాలని యాపిల్ భావిస్తోంది. మరోవైపు సిరిని ఆధునిక ఆర్కిటెక్చర్‌, కొత్త ఏఐ మోడళ్లతో పునర్నిర్మించేందుకు సిద్ధమవుతోంది. పాత సాంకేతిక నైపుణ్యాల స్థానంలో ఏఐ నిపుణులను నియమించుకునే దిశగా అడుగులు వేస్తోంది. విజన్ ఓఎస్ కొనసాగుతుందని స్పష్టం చేసిన యాపిల్, భవిష్యత్తులో స్మార్ట్ గ్లాసెస్‌పై దృష్టి సారించడంతో పాటు 2028 నాటికి కొత్త విజన్ ప్రో మోడల్‌ను తీసుకురావాలని లక్ష్యంగా పెట్టుకుంది.