గ్రోక్ వాయిస్ థింక్ ఫాస్ట్ 2.0 విడుదల..

ఎలాన్ మస్క్ నేతృత్వంలోని స్పేస్‌ఎక్స్‌ఏఐ తన అత్యాధునిక వాయిస్ ఆర్టిఫిషియల్ ఇంటెలిజెన్స్ మోడల్ గ్రోక్ వాయిస్ థింక్ ఫాస్ట్ 2.0ను విడుదల చేసింది. ఈ మోడల్ ఏప్రిల్‌లో విడుదలైన గ్రోక్ వాయిస్ థింక్ ఫాస్ట్ 1.0కు కొనసాగింపుగా వచ్చింది. ఆగస్టు 5 నుంచి ప్రస్తుతం ఉన్న వినియోగదారులందరినీ ఆటోమేటిక్‌గా కొత్త వెర్షన్‌కు మార్చనున్నట్లు కంపెనీ ప్రకటించింది. అయితే, పాత వెర్షన్‌ను ఉపయోగించాలనుకునే వారు దానిని పిన్ చేసుకునే అవకాశం ఉంటుంది. ఈ మోడల్ వినియోగానికి నిమిషానికి 0.08 డాలర్లు (సుమారు రూ.8) ధర నిర్ణయించారు. స్పీచ్ రీజనింగ్, ట్రాన్స్‌క్రిప్షన్ ఖచ్చితత్వం, సహజ సంభాషణ, టూల్ వినియోగంలో ఇది మరింత మెరుగైన పనితీరును అందిస్తుందని సంస్థ తెలిపింది.

కంపెనీ వెల్లడించిన బెంచ్‌మార్క్ ఫలితాల ప్రకారం గ్రోక్ వాయిస్ థింక్ ఫాస్ట్ 2.0 పలు పరీక్షల్లో ఓపెన్‌ఏఐ GPT-Realtime-2.1, గూగుల్ జెమినీ 3.1 ఫ్లాష్ మోడళ్లను అధిగమించింది.ఏఏ స్పీచ్-టు-స్పీచ్ క్వాలిటీ ఇండెక్స్‌లో 82.9 శాతం, బిగ్ బెంచ్ ఆడియో స్పీచ్ రీజనింగ్ పరీక్షలో 97.2 శాతం స్కోరు సాధించినట్లు పేర్కొంది. అయితే ఫుల్ డూప్లెక్స్ బెంచ్ కన్వర్సేషనల్ డైనమిక్స్ పరీక్షలో మాత్రం ఓపెన్‌ఏఐ జీపీటీ-రియల్‌టైమ్ 2.1 స్వల్ప ఆధిక్యాన్ని నమోదు చేసింది. వాయిస్ ఏఐ రంగంలో మరింత సహజమైన, వేగవంతమైన అనుభవాన్ని అందించడమే ఈ కొత్త మోడల్ లక్ష్యమని స్పేస్‌ఎక్స్‌ఏఐ వెల్లడించింది.