కమర్షియల్ గ్యాస్ సిలిండర్ ధరల పెంపు

పండుగ సీజన్‌కు ముందు కమర్షియల్ గ్యాస్ సిలిండర్ ధరలు మరోసారి పెరిగాయి. పలు నగరాల్లో 19 కేజీల సిలిండర్ ధర సుమారు రూ.62 మేర పెరగగా, కొత్త ధరలు నేటి నుంచే అమల్లోకి వచ్చాయి. దీంతో హోటళ్లు, రెస్టారెంట్లు, ఇతర వాణిజ్య సంస్థల నిర్వహణ ఖర్చులు పెరిగే అవకాశం ఉంది. అయితే గృహ వినియోగదారులు ఉపయోగించే డొమెస్టిక్ గ్యాస్ సిలిండర్ ధరల్లో ఎలాంటి మార్పు లేదు.

ఢిల్లీలో కమర్షియల్ సిలిండర్ ధర రూ.62.50 పెరిగి రూ.2,747.50కి చేరింది. ముంబైలో రూ.63 పెరిగి రూ.2,764గా ఉంది. చెన్నైలో 19.2 కేజీల కమర్షియల్ సిలిండర్ ధర రూ.2,916.50కు చేరుకుంది. హైదరాబాద్‌లో రూ.69 పెరిగి రూ.3,065గా ఉంది. అంతర్జాతీయ ఎల్‌పీజీ ధరలు, విదేశీ మారకపు విలువ వంటి అంశాల ఆధారంగా చమురు మార్కెటింగ్ సంస్థలు కమర్షియల్ సిలిండర్ ధరలను సవరిస్తుంటాయి. గృహ వినియోగ సిలిండర్ ధరలను మాత్రం సామాన్యులపై భారం తగ్గించేలా ప్రభుత్వం నియంత్రిస్తోంది.