జియో ప్లాట్‌ఫామ్స్‌ మెగా ఐపీఓ..

రిలయన్స్‌ ఇండస్ట్రీస్‌కు చెందిన డిజిటల్‌ సర్వీసెస్‌ విభాగం జియో ప్లాట్‌ఫామ్స్‌ మెగా ఐపీఓకు సిద్ధమవుతోంది. తాజా మీడియా కథనాల ప్రకారం.. సుమారు రూ.37,700 కోట్ల విలువైన పబ్లిక్‌ ఇష్యూ అక్టోబర్‌ 21న ప్రారంభమై, అక్టోబర్‌ 23న ముగిసే అవకాశం ఉంది. అక్టోబర్‌ 19న యాంకర్‌ ఇన్వెస్టర్ల బిడ్డింగ్‌ ప్రారంభం కావచ్చని, అక్టోబర్‌ 28న షేర్లు స్టాక్‌ ఎక్స్చేంజీల్లో లిస్ట్‌ అయ్యే అవకాశం ఉందని సమాచారం. అయితే మార్కెట్‌ పరిస్థితులను బట్టి ఈ తేదీల్లో మార్పులు ఉండొచ్చని నివేదికలు పేర్కొంటున్నాయి. ఐపీఓలో భాగంగా 27 కోట్ల వరకు తాజా ఈక్విటీ షేర్లను జారీ చేయనున్నారు. ఇవి పోస్ట్‌-ఇష్యూ ఈక్విటీ క్యాపిటల్‌లో సుమారు 2.9 శాతానికి సమానం.

ఐపీఓ ద్వారా వచ్చే నిధుల్లో ప్రధాన భాగాన్ని జియో ప్లాట్‌ఫామ్స్‌ అనుబంధ సంస్థ రిలయన్స్‌ జియో ఇన్ఫోకామ్‌కు సంబంధించిన సుమారు రూ.27,500 కోట్ల రుణాలను చెల్లించేందుకు లేదా ముందస్తుగా తీర్చేందుకు వినియోగించనున్నారు. మిగిలిన మొత్తాన్ని సాధారణ కార్పొరేట్‌ అవసరాలకు ఉపయోగించనున్నట్లు డ్రాఫ్ట్‌ పత్రాల్లో పేర్కొన్నారు. ఈ ప్రతిపాదిత ఐపీఓకు సెబీ ఆమోదం లభించడంతో దేశీయ స్టాక్‌ మార్కెట్‌లో ఈ భారీ పబ్లిక్‌ ఇష్యూపై ఆసక్తి నెలకొంది.