తెలుగు రాష్ట్రాలపై జునో ఇన్సూరెన్స్‌ ప్రత్యేక దృష్టి

కొత్త తరం డిజిటల్‌ బీమా సంస్థ జునో జనరల్‌ ఇన్సూరెన్స్‌ ఆంధ్రప్రదేశ్‌, తెలంగాణ మార్కెట్లపై మరింతగా దృష్టి సారించనుంది. ప్రస్తుత ఆర్థిక సంవత్సరం తొలి అర్ధభాగంలో తెలుగు రాష్ట్రాల్లో 39 శాతం ప్రీమియం వృద్ధిని నమోదు చేసినట్లు సంస్థ చీఫ్‌ డిస్ట్రిబ్యూషన్‌ ఆఫీసర్‌ జాక్సన్‌ జాకబ్‌, చీఫ్‌ ప్రొడక్ట్‌ ఆఫీసర్‌ పూజా యాదవ్‌ తెలిపారు.

ఏపీ, తెలంగాణల్లో జునో ఇన్సూరెన్స్‌ వ్యాపారంలో మోటార్‌ బీమా వాటా గణనీయంగా ఉందని జాక్సన్‌ జాకబ్‌ తెలిపారు. ఆరోగ్య బీమాపై కూడా సంస్థ క్రమంగా దృష్టి సారిస్తోందని పేర్కొన్నారు. రానున్న రోజుల్లో రెండు రాష్ట్రాల మార్కెట్లను కీలకంగా పరిగణిస్తూ కార్యకలాపాలను విస్తరించనున్నట్లు చెప్పారు. డిస్ట్రిబ్యూషన్‌ భాగస్వాములతో పాటు మోటార్‌ కంపెనీలతో భాగస్వామ్యాలు ఏర్పాటు చేసుకోనున్నట్లు వెల్లడించారు.

కంపెనీ యాప్‌లో అందుబాటులో ఉన్న మొబైల్‌ టెలిమాటిక్స్‌ కార్యక్రమం ద్వారా వాహనదారుల రియల్‌టైమ్‌ డ్రైవింగ్‌ విధానం, ఇంధన ఆదా వంటి వివరాలను విశ్లేషిస్తున్నట్లు పూజా యాదవ్‌ తెలిపారు. ఈ వివరాల ఆధారంగా డ్రైవింగ్‌ తీరును అంచనా వేసి బీమా ప్రీమియాలను నిర్ణయిస్తున్నట్లు పేర్కొన్నారు.