జీఎస్టీ కౌన్సిల్‌ సమావేశంలో కీలక సిఫార్సులు

జీఎస్టీ కౌన్సిల్‌ సమావేశంలో సరుకుల రవాణాను మరింత సులభతరం చేసే కీలక సిఫార్సులు చేశారు. సరుకులను తనిఖీ చేయడం, నిర్బంధించడం లేదా స్వాధీనం చేసుకునే అధికారం సరఫరా రాష్ట్రం లేదా గమ్యస్థాన రాష్ట్రానికి చెందిన అధికారులకే పరిమితం చేయాలని కౌన్సిల్‌ సిఫార్సు చేసింది. ఇంటెలిజెన్స్‌ ఆధారాలు ఉన్నప్పుడు మాత్రమే సరుకులను అడ్డుకునేందుకు అనుమతించాలని, ఇందుకు జాయింట్‌ కమిషనర్‌ స్థాయి అధికారి అనుమతి తప్పనిసరి చేయాలని ప్రతిపాదించింది.

మరోవైపు జీఎస్టీ రేట్లలో ఎలాంటి మార్పులు చేయలేదు. ప్రాసిక్యూషన్‌ పరిమితిని రూ.1 కోటి నుంచి రూ.5 కోట్లకు పెంచాలని, రూ.5 కోట్ల వరకు టర్నోవర్‌ ఉన్న చిన్న వ్యాపారులకు ఏడాదికి ఒకసారి మాత్రమే రిటర్న్‌ దాఖలు చేసే అవకాశం కల్పించాలని సిఫార్సు చేసింది. అధికారులకు ఉన్న అరెస్ట్‌ అధికారాలను తొలగించడం, జరిమానా పరిమితిని రూ.25 వేల నుంచి రూ.10 వేలకు తగ్గించడం, అన్ని ప్లాట్‌ఫామ్‌లకు ఒకే పన్ను విధానం అమలు చేయడం వంటి ప్రతిపాదనలు చేసింది. రిఫండ్స్‌ ప్రాసెసింగ్‌ సమయాన్ని 10 రోజులకు తగ్గించి, 90 శాతం రిఫండ్స్‌ ఆటోమేటిక్‌గా క్లియర్‌ అయ్యేలా సంస్కరణలు చేపట్టాలని సూచించింది.