బాండ్ పెట్టుబడుల కోసం పీబీ మనీ కీలక అడుగు

పైసాబజార్‌తో అనుబంధం కలిగిన పీబీ మనీ సంస్థకు మార్కెట్ నియంత్రణ సంస్థ సెబీ నుంచి ఆన్‌లైన్ బాండ్ ప్లాట్‌ఫారమ్ ప్రొవైడర్ (ఓబీపీపీ) లైసెన్స్ లభించింది. ఈ అనుమతితో రిటైల్ మదుపరులకు బాండ్ మార్కెట్‌ను మరింత చేరువ చేయడంతో పాటు, పెట్టుబడుల ప్రక్రియను సులభతరం చేయాలని సంస్థ లక్ష్యంగా పెట్టుకుంది.

ఈ లైసెన్స్ ద్వారా పెట్టుబడిదారుల నమోదు, కేవైసీ ధ్రువీకరణ నుంచి బాండ్ల ఎంపిక, ఆర్డర్ నమోదు, చెల్లింపుల సమన్వయం, పెట్టుబడి అనంతర సేవల వరకు మొత్తం ప్రక్రియను పీబీ మనీ నిర్వహించనుంది. పైసాబజార్‌తో వ్యూహాత్మక భాగస్వామ్యం ద్వారా దేశవ్యాప్తంగా మరింత మంది వినియోగదారులకు ఈ సేవలను అందుబాటులోకి తీసుకురావాలని భావిస్తోంది. వినియోగదారుల మారుతున్న ఆర్థిక అవసరాలను తీర్చడంలో పెట్టుబడులు కీలకమని, ఓబీపీపీ లైసెన్స్‌తో బాండ్లలో పెట్టుబడి పెట్టే ప్రక్రియ మరింత సులభమవుతుందని పీబీ మనీ డైరెక్టర్, పైసాబజార్ సీఈఓ సంతోష్ అగర్వాల్ తెలిపారు.