యూకే వ్యక్తి వింత ప్రయోగం..విమానంతో ఏం చేశాడో తెలుసా?

యూకేలో ఓ వ్యక్తి చేసిన వింత ప్రయోగం ప్రస్తుతం ఆసక్తికరంగా మారింది. డెర్బీషైర్‌కు చెందిన ఇంజినీర్ డేవ్ బిల్లింగ్స్ ఫేస్‌బుక్‌లో అమ్మకానికి ఉంచిన పాత బోయింగ్ 737 విమానాన్ని కొనుగోలు చేసి, తన ఇంటి వెనక తోటలో పాతిపెట్టాడు. కొన్ని నెలల క్రితం ఫేస్‌బుక్‌లో ఈ విమానాన్ని చూసిన ఆయన సుమారు రూ.5 లక్షలకు దాన్ని కొనుగోలు చేసినట్లు సమాచారం. అనంతరం ఇంటి వెనక తోటలో 14 అడుగుల లోతైన గొయ్యి తవ్వించి, అందులో విమానం బాడీని ఉంచాడు. పైభాగాన్ని పూర్తిగా కాంక్రీట్‌తో మూసివేసి, దానిని రహస్య అండర్‌గ్రౌండ్ ప్రదేశంగా మార్చాడు.

విమానంలో విద్యుత్, నీటి సౌకర్యాలను కూడా ఏర్పాటు చేశాడు. అందులోని టాయిలెట్‌ను ఇంటి సెప్టిక్ ట్యాంక్‌కు అనుసంధానించడంతో పాటు, లోపలికి వెళ్లేందుకు రహస్య మార్గాన్ని నిర్మించాడు. కుటుంబ సభ్యులతో కలిసి సమయం గడపడానికి, పార్టీలు నిర్వహించడానికి ప్రత్యేకమైన ప్రదేశం కావాలనే ఉద్దేశంతో ఈ ఏర్పాటు చేసినట్లు డేవ్ బిల్లింగ్స్ వెల్లడించాడు. అంతేకాకుండా, శత్రు దేశాల దాడులు లేదా మూడో ప్రపంచ యుద్ధం వంటి పరిస్థితులు తలెత్తితే దీనిని బంకర్‌గా ఉపయోగించుకోవచ్చని తెలిపాడు. పాత విమానాన్ని అన్ని సౌకర్యాలతో కూడిన భూగర్భ రహస్య ప్రదేశంగా మార్చిన తీరు ఇప్పుడు అందరి దృష్టిని ఆకర్షిస్తోంది.