ఏపీ స్థానిక సంస్థల ఎన్నికలపై రేపు హైకోర్టు తీర్పు..

ఆంధ్రప్రదేశ్‌లో స్థానిక సంస్థల ఎన్నికల నిర్వహణకు సంబంధించిన పిటిషన్లపై ఏపీ హైకోర్టు రేపు తీర్పు వెలువరించనుంది. మొత్తం ఐదు పిటిషన్లపై న్యాయస్థానం తీర్పు ఇవ్వనుంది. బీసీలకు 34 శాతం రిజర్వేషన్లను సవాల్‌ చేస్తూ దాఖలైన పిటిషన్‌, ఎస్‌ఐఆర్‌ ప్రక్రియ పూర్తయ్యే వరకు స్థానిక సంస్థల ఎన్నికలను వాయిదా వేయాలని వైఎస్సార్‌ కాంగ్రెస్‌ పార్టీ దాఖలు చేసిన పిటిషన్‌ ఇందులో ఉన్నాయి. ఈ అంశాలపై ఇప్పటికే వాదనలు పూర్తికాగా.. తీర్పును హైకోర్టు రిజర్వ్‌ చేసింది.

స్థానిక సంస్థల ఎన్నికలను నిర్ణీత సమయంలో నిర్వహించాలని కోరుతూ మరో పిటిషన్‌ దాఖలైంది. అలాగే కొన్ని పంచాయతీలను మున్సిపాలిటీల్లో విలీనం చేయడాన్ని సవాల్‌ చేస్తూ మరో పిటిషన్‌ దాఖలైంది. ఈ కేసుల్లో హైకోర్టు తీర్పు వెలువడిన తర్వాత ఎన్నికల ప్రక్రియపై మరింత స్పష్టత వచ్చే అవకాశం ఉంది. న్యాయపరమైన అంశాలు పరిష్కారమైన వెంటనే ఎన్నికల ప్రక్రియను ముందుకు తీసుకెళ్లేందుకు ప్రభుత్వం సిద్ధంగా ఉందని ఇప్పటికే తెలిపింది.