ఏపీలో రాజకీయ పార్టీలతో ముగిసిన ఎస్‌ఈసీ సమావేశం

ఆంధ్రప్రదేశ్‌లో స్థానిక సంస్థల ఎన్నికల నిర్వహణకు సంబంధించి రాష్ట్ర ఎన్నికల సంఘం (ఎస్‌ఈసీ) రాజకీయ పార్టీల ప్రతినిధులతో నిర్వహించిన సమావేశం ముగిసింది. ఈ సమావేశానికి 19 రాజకీయ పార్టీల ప్రతినిధులు హాజరై ఎన్నికల నిర్వహణకు సంబంధించి పలు సూచనలు చేశారు. కుల ధ్రువీకరణ పత్రాలు, నో డ్యూ సర్టిఫికెట్ల జారీలో జాప్యం లేకుండా చూడాలని కోరారు. ఎన్నికల సమయంలో మద్యం నియంత్రణకు తగిన చర్యలు తీసుకోవాలని సూచించారు.

దసరా ఉత్సవాలకు ఎలాంటి ఇబ్బందులు కలగకుండా ఎన్నికల ప్రక్రియను నిర్వహించాలని ఎస్‌ఈసీ అనిల్ పేర్కొన్నారు. రాజకీయ పార్టీలు చేసిన సూచనలపై సంబంధిత జిల్లాలకు ఆదేశాలు జారీ చేస్తామని తెలిపారు. ఆన్‌లైన్ నామినేషన్ల విధానాన్ని పరిశీలిస్తామని, సున్నిత ప్రాంతాల్లో తగిన పోలీసు బందోబస్తు ఏర్పాటు చేస్తామని వెల్లడించారు. స్థానిక సంస్థల ఎన్నికలను చట్టప్రకారం నిర్వహిస్తామని స్పష్టం చేశారు.